టిమ్ సౌథీ.. ఈ పేరు వినగానే క్రికెట్ అభిమానులకు ఓ బౌలర్ గుర్తొస్తాడు. కివీస్ తరఫున ఆడుతున్న సౌథీ... స్వింగ్, పేస్తో ప్రత్యర్థి బ్యాట్స్మెన్ను ఇబ్బందిపెట్టగలడు. సిక్సులూ కొట్టగలడు. ఈ ప్రతిభతోనే టెస్టుల్లో సచిన్ తెందూల్కర్ను సమం చేశాడు.
ఎలా సాధ్యం...?
శ్రీలంక-న్యూజిలాండ్ మధ్య గాలే వేదికగా మొదటి టెస్టు జరుగుతోంది. ఈ మ్యాచ్లో కివీస్ బౌలర్ సౌథీ 10వ స్థానంలో బ్యాటింగ్కు దిగి 19 బంతుల్లో 14 పరుగులు చేశాడు. ధనుంజయ డిసిల్వా బౌలింగ్లో సిక్సు బాదాడు. తద్వారా టెస్టు క్రికెట్లో 69 సిక్సులు కొట్టిన సచిన్ను సమం చేశాడు. వీరిద్దరూ ఈ జాబితాలో ప్రస్తుతం 17వ స్థానంలో కొనసాగుతున్నారు.
సచిన్ 329 ఇన్నింగ్స్ల్లో 69 సిక్సులు సాధించగా.. సౌథీ కేవలం 89 ఇన్నింగ్స్లే తీసుకున్నాడు. ఇంకో సిక్స్ కొడితే సచిన్ను దాటి పాకిస్థాన్ మాజీ బ్యాట్స్మెన్ యూనిస్ ఖాన్ (70)ను సమం చేయనున్నాడీ బౌలర్.
టెస్టు క్రికెట్లో అత్యధిక సిక్సులు కొట్టిన రికార్డు కివీస్ మాజీ సారథి బ్రెండన్ మెక్కల్లమ్ పేరిట ఉంది. 176 ఇన్నింగ్స్ల్లో 107 సిక్సులు బాదాడీ ఆటగాడు. ఇతడితో పాటు ఆసీస్ మాజీ వికెట్ కీపర్ గిల్క్రిస్ట్ మాత్రమే ఈ ఫార్మాట్లో వందకు పైగా సిక్సులు కొట్టారు.
ఇవీ చూడండి.. బంతి తగిలి... అంపైర్ మృతి
