టీ20 ఫార్మాట్కు టీమ్ఇండియా మాజీ కెప్టెన్ సౌరభ్ గంగూలీ సరిపోతాడనే విషయంపై తనకు నమ్మకం లేదని కోల్కతా నైట్రైడర్స్ మాజీ కోచ్ జాన్ బుచానన్ అన్నాడు. భారత్కు చెందిన దిగ్గజ ఆటగాళ్లలో గంగూలీ ఒకడైనా.. ఐపీఎల్ లేదా టీ20 మ్యాచ్లకు అతను సరిపోడని అభిప్రాయపడ్డాడు. ఈ విషయాన్ని తాను దాదాతోనూ చర్చించినట్లు తాజాగా ఓ ఇంటర్వ్యూలో వెల్లడించాడు. టీ20ల్లో మైదానంలోనే త్వరగా నిర్ణయాలు తీసుకోవాల్సిన అవసరం ఉందని.. అందుకు గంగూలీ సిద్ధంగా లేడని పేర్కొన్నాడు.
"కెప్టెన్గా టీ20 మ్యాచ్ల్లో త్వరగా నిర్ణయాలు తీసుకునే అవసరం ఉంటుంది. పొట్టి ఫార్మాట్కు తగ్గట్టుగా ఆటగాళ్ల ఆటతీరు, ఆలోచనలలో మార్పు రావాలి. అందుకే సౌరభ్ గంగూలీతో నేను ఈ విషయం గురించి మాట్లాడా. అతను ఈ ఫార్మాట్ కోసం సరిపోతాడని నేను అనుకోను."
-జాన్ బుచానన్, కోల్కతా నైట్రైడర్స్ మాజీ కోచ్
2008లో జరిగిన ఐపీఎల్ తొలి సీజన్లో గంగూలీ, కోచ్ జాన్ బుచానన్ కోల్కతా నైట్రైడర్స్ జట్టుకు కలిసి పని చేశారు. ఆ లీగ్లో కోల్కతా ఆరో స్థానంలో నిలిచింది. అప్పుడు గంగూలీ కెప్టెన్సీతో బుచానన్ సంతృప్తిగా లేకపోవడం వల్ల 2009లో కెప్టెన్గా బ్రెండన్ మెక్కలమ్ను ఎంచుకుంది ఫ్రాంచైజీ. ఆ సీజన్లో జట్టు చివరి స్థానంతో సరిపెట్టుకుంది. ఆ తర్వాత బుచానన్ను కోచ్ పదవి నుంచి తొలగించింది కేకేఆర్ యాజమాన్యం.
