గుండెపోటుతో శనివారం ఆస్పత్రిలో చేరిన బీసీసీఐ అధ్యక్షుడు సౌరవ్ గంగూలీ హెల్త్ బులిటిన్ను వైద్యులు విడుదల చేశారు. దాదా ఆరోగ్యం ప్రస్తుతం నిలకడగానే ఉందని.. ఆందోళన చెందాల్సిన అవసరం లేదని తెలిపారు.
"గంగూలీ రాత్రి కొంచెం అసౌకర్యంగా కనిపించారు. గతరాత్రితో పోలిస్తే పరిస్థితి కొంచెం మెరుగ్గానే ఉంది. ప్రస్తుతం ఆయన నిద్రిస్తున్నారు" అని ఆస్పత్రి వైద్యులు తెలిపారు. రక్తపోటు (110/70), ఆక్సిజన్ స్థాయి కంట్రోల్లో ఉన్నట్లు వెల్లడించారు. ఆదివారం ఉదయం ఈసీజీ నిర్వహించామని డాక్టర్లు చెప్పారు.
"గుండె రక్తనాళాల వ్యాధి కారణంగా గంగూలీకి మరోసారి యాంజియోప్లాస్టీ చేయాల్సిఉంటుంది. అది కూడా తన ఆరోగ్య పరిస్థితిని బట్టి చేయాలి. ప్రస్తుతం ఆయనకు పెద్దగా ప్రమాదమేమి లేదు" అని ఆస్పత్రి వైద్యులు వెల్లడించారు.
