బీసీసీఐ అధ్యక్షుడు సౌరభ్ గంగూలీ... ఒకవేళ ఐసీసీ చీఫ్‌గా నియమితులైతే, తన నిషేధంపై అంతర్జాతీయ క్రికెట్ మండలికి అప్పీల్‌ చేస్తానని పాక్ మాజీ స్పిన్నర్ డానిష్ కనేరియా అన్నాడు. ఐసీసీ, తనకు అన్ని విధాలా సహకరిస్తుందనే నమ్మకముందని చెప్పాడు. ఈ సందర్భంగా మాట్లాడుతూ గంగూలీపై ప్రశంసలు కురిపించాడు.
"గంగూలీ అద్భుత క్రికెటర్. చిన్నచిన్న విషయాలు బాగా అర్థం చేసుకుంటారు. ఐసీసీ అధ్యక్ష పదవికి అతడి కంటే సరైన వ్యక్తి ఇంకొకరు లేరు. భారత జట్టును సరైన మార్గంలో నడిపించారు. ఆ తర్వాత ధోనీ, విరాట్‌ దానిని కొనసాగిస్తున్నారు. గంగూలీ ప్రస్తుతం బీసీసీఐ అధ్యక్షుడిగా ఉన్నారు. ఒకవేళ ఐసీసీ చీఫ్‌గా నియమితులైతే క్రికెట్‌ను మరింత ముందుకు తీసుకెళతారు. ఆ నమ్మకం నాకుంది. ఆ పదవిని చేపట్టడానికి కావాలసిన శక్తి సామర్థ్యాలు ఆయనకు ఉన్నాయి. ఈ విషయంలో పాక్ బోర్డు మద్దతు అవసరం లేదు"
-కనేరియా, పాక్ మాజీ స్పిన్నర్
పాకిస్థాన్ తరఫున కనేరియా 261 టెస్టు వికెట్లు పడగొట్టాడు. అతడికన్నా ముందు వసీం అక్రమ్‌, వకార్‌ యూనిస్‌, ఇమ్రాన్‌ ఖాన్‌ మాత్రమే ఈ ఘనత సాధించారు. 2012లో ఎసెక్స్‌ జట్టు తరఫున ఆడుతూ స్పాట్‌ ఫిక్సింగ్‌ ఉదంతంలో చిక్కుకున్నాడు. తొలుత తన నేరాన్ని అంగీకరించకపోయినా, 2018లో ఒప్పుకున్నాడు. దీంతో అతడిపై జీవితకాల నిషేధం విధించారు.
