శ్రీలంక ఆటగాళ్లు పాకిస్థాన్ పర్యటనకు రావడానికి వెనుకడుగు వేస్తున్నాయి. అందుకు కారణం ఐపీఎల్ అని అంటున్నాడు పాక్ మాజీ ఆటగాడు అఫ్రిదీ. ఐపీఎల్ ఫ్రాంఛైజీలు లంక ఆటగాళ్లపై ఒత్తిడి తీసుకొస్తున్నాయని అన్నాడు.
"శ్రీలంక ఆటగాళ్లపై ఐపీఎల్ ఫ్రాంఛైజీలు ఒత్తిడి తీసుకొస్తున్నాయి. పాకిస్థాన్ సూపర్ లీగ్ ఆడటానికి లంక ఆటగాళ్లతో మాట్లాడినపుడు వారు ఇదే విషయం చెప్పారు. పీఎస్ఎల్లో ఆడటానికి మీరు పాక్ వెళితే మీకు కాంట్రాక్ట్ దక్కదు అని ఫ్రాంఛైజీలు ఆటగాళ్లకు చెబుతున్నాయి.''
-షాహిద్ అఫ్రిదీ, పాక్ మాజీ ఆటగాడు
అఫ్రిదీ ట్వీట్
పాక్ పర్యటనకు దూరంగా ఉన్న క్రికెటర్లలో లంక జట్టు వన్డే, టీ20 కెప్టెన్ మలింగ, దిముత్ కరుణరత్నేతో పాటు తిసార పెరీరా, మాథ్యూస్, నీరోషాన్ డిక్వెలా, కుషాల్ పెరీరా, ధనంజయ డిసిల్వా, అఖిల ధనంజయ, సురంగ లక్మల్, దినేశ్ చండీమల్ ఉన్నారు. కానీ ఇందులో ఐపీఎల్ కాంట్రాక్ట్ ఉంది కేవలం మలింగకు మాత్రమే. అఖిల ధనంజయను 2018లో ముంబయి ఇండియన్స్ కొనుగోలు చేసినా చివరి సీజన్లో వదులుకుంది. ఈ కారణంగా అఫ్రిదీ చెప్పిన ఈ మాటలు నమ్మశక్యంగా లేవని పలువురు అభిప్రాయపడుతున్నారు.
"పాకిస్థాన్ ఎల్లపుడూ శ్రీలంకకు మద్దతు తెలుపుతుంది. లంక పర్యటనకు మేము ఎప్పుడూ విశ్రాంతి తీసుకోలేదు. పాక్లో పర్యటించేలా లంక క్రికెట్ బోర్డు కాంట్రాక్ట్ ఆటగాళ్లపై ఒత్తిడి తీసుకురావాలి. శ్రీలంక ఆటగాళ్లు ఎవరైతే పాక గడ్డపై మ్యాచ్ ఆడతారో వారు పాకిస్థాన్ చరిత్రలో నిలిచిపోతారు."
-షాహిద్ అఫ్రిదీ, పాక్ మాజీ ఆటగాడు
అఫ్రిదీ ట్వీట్
షెడ్యూల్ ప్రకారం శ్రీలంక జట్టు సెప్టెంబర్ 27 నుంచి అక్టోబర్ 9 వరకు పాక్తో మూడు వన్డే, మూడు టీ20ల సిరీస్ ఆడాలి.
ఇవీ చూడండి.. హార్దిక్ పాండ్య.. లోకల్ టు నేషనల్
