భారత దిగ్గజ క్రికెటర్ సచిన్ తెందూల్కర్, వెస్టిండీస్ దిగ్గజం బ్రియాన్ లారా మళ్లీ మైదానంలో సందడి చేయనున్నారు. రోడ్ సేఫ్టీ వరల్డ్ సిరీస్లో భాగంగా వచ్చే ఏడాది జరగనన్న టీ20 టోర్నీలో వీరిద్దరూ ఆడనున్నారు.
మరింత జోష్ కోసం...
ఈ టోర్నీలో మొత్తం ఐదు దేశాలు పాలుపంచుకుంటాయి. ఆస్ట్రేలియా, దక్షిణాఫ్రికా, శ్రీలంక, వెస్టిండీస్, భారత్‌కు చెందిన మాజీ క్రికెటర్లు మైదానంలో ఆడతారు. సచిన్, లారాతో పాటు మాజీ డాషింగ్ ఓపెనర్ వీరేంద్ర సెహ్వాగ్, ఆస్ట్రేలియా గ్రేట్ బౌలర్ బ్రెట్లీ, శ్రీలంక ఓపెనర్ దిల్షాన్, దక్షిణాఫ్రికా మాజీ క్రికెటర్ జాంటీ రోడ్స్ కూడా ఈ టోర్నమెంటులో కనువిందు చేయనున్నారు. వచ్చే ఏడాది భారత్ వేదికగానే ఫిబ్రవరి 2 నుంచి 16 వరకు ఈ టోర్నీ జరుగుతుంది.
ఇద్దరూ ఇద్దరే...
46 ఏళ్ల మాస్టర్ బ్లాస్టర్ సచిన్ తెందూల్కర్ టెస్టుల్లోనూ, వన్డేల్లోనూ అనేక రికార్డులు ఖాతాలో వేసుకున్నాడు. ప్రపంచ క్రికెట్లో 100 సెంచరీలు సాధించాడు. 2013లో అంతర్జాతీయ క్రికెట్‌కు వీడ్కోలు పలికాడు. 2008లో టెస్టుల్లో అత్యధిక పరుగులు చేసిన బ్రియాన్ లారా(11,953) రికార్డుని బద్దలు కొట్టాడు సచిన్.
2007లో అంతర్జాతీయ క్రికెట్‌కు వీడ్కోలు పలికాడు లారా. టెస్టుల్లో అత్యధిక వ్యక్తిగత పరుగులు చేసిన ఆటగాడిగా లారా పేరిటే రికార్డు ఉంది. 2004లో ఆంటిగ్వా వేదికగా ఇంగ్లాండ్‌తో జరిగిన మ్యాచ్‌లో బ్రియాన్ లారా 400 పరుగులతో అజేయంగా నిలిచి ఈ రికార్డు నెలకొల్పాడు.
