టీమ్ఇండియాతో జరిగిన రెండోటెస్టులో అద్భుతంగా ఆల్రౌండ్ ప్రదర్శన చేసిన ఇంగ్లాండ్ ఆటగాడు మొయిన్ అలీ.. సిరీస్ మధ్యలోనే స్వదేశానికి వెళ్లడం చర్చనీయాంశమైంది. దీనికి కారణం ఆ జట్టులోని రొటేషన్ పాలనే అని క్రికెట్ విశ్లేషకులు అంటున్నారు. అయితే, మొయిన్ అలీ స్వదేశానికి తిరిగి వెళ్లాలని నిర్ణయించుకున్నాడని మ్యాచ్ ముగిసిన తర్వాత ఆ జట్టు కెప్టెన్ జో రూట్ అన్నాడు. ఆ వ్యాఖ్యలు ప్రస్తుతం వివాదంగా మారడం వల్ల మొయిన్ అలీకి రూట్ క్షమాపణలు తెలిపనట్లు బ్రిటీష్ వార్తాసంస్థలు వెల్లడించాయి.
"మొయిన్ అలీ స్వదేశానికి వెళ్లాలని నిర్ణయించుకున్నాడు. అతడికి ఇది చాలా కష్టమైన పర్యటన. వరుస పర్యటనల నేపథ్యంలో బయో-బబుల్ నుంచి ఏ ఆటగాడైన బయటకు రావాలని అనుకుంటే.. దానికి మద్దతుగా నిలవడం మాకు ముఖ్యం. అది అతడి నిర్ణయం కాబట్టి.. మిగిలిన టెస్టులకు ఉండమని అడగలేదు. అయితే సిరీస్కు వీలైనంత ఎక్కువ మంది ఆటగాళ్లను ఉంచాలని కోరుకున్నాం. కానీ, ప్రతి ఆటగాడి సౌకర్యాలనూ మేము గౌరవించాలి".
- రెండో టెస్టు అనంతరం రూట్ ప్రసంగం
చెపాక్ వేదికగా జరిగిన రెండు టెస్టుల్లోనూ భారత్, ఇంగ్లాండ్ జట్లు చెరో మ్యాచ్లో గెలుపొంది సిరీస్ను సమం చేశాయి. రెండో టెస్టులో ఇంగ్లాండ్ క్రికెటర్ మొయిన్ అలీ తన ఆల్రౌండ్ ప్రదర్శనతో ఆకట్టుకున్నాడు. తొలి ఇన్నింగ్స్లో 4 వికెట్లు, రెండో ఇన్నింగ్స్లో 4 వికెట్లను తన ఖాతాలో వేసుకున్నాడు. ఇంగ్లాండ్ ఓటమికి చేరువైన సమయంలో బ్యాటింగ్ బరిలో దిగి.. కేవలం 18 బంతుల్లోనే 43 పరుగులు చేశాడు.
ఇదీ చూడండి: 'వాలిమై' సినిమా గురించి మొయిన్ అలీ అడిగాడు'
