మెల్బోర్న్ వేదికగా భారత్తో జరిగిన రెండో టెస్టులో నిర్ణీత సమయంలో ఓవర్ల కోట పూర్తి చేయని విషయాన్ని ఒప్పుకొన్నాడు ఆస్ట్రేలియా ప్రధాన కోచ్ జస్టిన్ లాంగర్. దీనికి తమ జట్టు తగిన మూల్యం చెల్లించుకుందని అభిప్రాయపడ్డాడు.
"స్లో ఓవర్ రేట్ వల్ల ప్రపంచ టెస్టు ఛాంపియన్షిప్ ఫైనల్ అవకాశాలు కోల్పోయాం. నిర్ణీత సమయంలో ఓవర్లు పూర్తి చేయని కారణంగా నాలుగు పాయింట్ల కోత పడింది. అలా జరిగి ఉండకపోతే.. పాయింట్ల పట్టికలో ఆసీస్ రెండో స్థానంలో ఉండేది."
-జస్టిన్ లాంగర్, ఆస్ట్రేలియా ప్రధాన కోచ్.
"ఆట ముగిశాక మేమీ విషయాన్ని గుర్తించాం. స్లో ఓవర్ రేట్ అనేది ప్రపంచ టెస్టు ఛాంపియన్షిప్పై ప్రభావం చూపిస్తుందనుకున్నా. ఇదే విషయాన్ని ఆటగాళ్లతో చెప్పా. తర్వాత సిడ్నీ, బ్రిస్బేన్ టెస్టుల్లో ఈ తప్పిదం పునరావృతం కావొద్దని సూచించా. కానీ, జరగాల్సిన నష్టం జరిగింది" అని లాంగర్ పేర్కొన్నాడు.
"స్వీయ తప్పిదం వల్ల డబ్ల్యూటీసీ ఫైనల్ అవకాశాలు చేజారడం.. చాలా నిరాశకు గురి చేసింది. కానీ, ఇలాంటి తప్పిదాలు మరోసారి జరగకుండా ఉండటానికి ఇదొక గుణపాఠం" అని లాంగర్ తెలిపాడు.
ఇదీ చదవండి: అత్యధిక కాలం నెం.1గా 'జకో' ఆల్టైం రికార్డు
