ప్రపంచకప్లో రాయుడుకు స్థానం లభించపోవడంపై భారత మాజీ క్రికెటర్ గంభీర్ స్పందించాడు. రాయుడుకు చోటు కల్పించకపోవడం పట్ల ఆశ్చర్యం వ్యక్తం చేశాడు. కేవలం మూడు మ్యాచ్ల్లో విఫలమవడం వల్ల ఎంపిక చేయలేకపోవడం దురదృష్టమని వ్యాఖ్యానించాడు.
"ప్రస్తుతం పంత్ స్థానం గురించే అందరూ మాట్లాడుకుంటున్నారు. కానీ రాయుడును తప్పించడమే అతి పెద్ద చర్చ. చోటు లభించకపోతే బాధ ఎలా ఉంటుందో నాకు తెలుసు. వన్డేల్లో 48 సగటు ఉండి కూడా ఎంపిక కాకపోవడం దురదృష్టకరం".
గంభీర్, భారత ఆటగాడు
భారత జట్టులో నాలుగో స్థానానికి రాయుడు సరిగ్గా సరిపోతాడని కొన్ని నెలల క్రితం కోహ్లీ చెప్పిన విషయం తెలిసిందే. స్వదేశంలో ఆస్ట్రేలియాతో జరిగిన సిరీస్లో ఫామ్ కోల్పోవడం వల్ల సెలెక్టర్లు పునరాలోచనలో పడ్డారు.
2007 ప్రపంచకప్లో తనకు స్థానం లభించలేదని.. అందుకే ఆ పరిస్థితుల్లో మనోవేదన ఎలా ఉంటుందో తెలుసని రాయుడికి సానుభూతి తెలిపాడు గంభీర్. ప్రపంచకప్ ఆడాలని ప్రతి ఆటగాడు కోరుకుంటాడని.. రాయుడుకు చోటు లభించకపోవడం దురదృష్టకరమని వ్యాఖ్యానించాడు.
"వన్డే క్రికెట్లో పంత్కు అంత అనుభవం లేదు. కొన్ని అవకాశాలు వచ్చినా వాటిని సద్వినియోగం చేసుకోలేకపోయాడు. ఇదంత పెద్ద చర్చేమీ కాదు. పంత్కు ఇంకా వయసుంది. ప్రస్తుతం టెస్టుల్లో బాగా రాణిస్తున్నాడు.. అలాగే దిల్లీ క్యాపిటల్స్ జట్టును ఐపీఎల్ ప్లేఆఫ్స్ చేరేలా చేయడం పంత్ ముందున్న కర్తవ్యం".
గంభీర్, భారత ఆటగాడు
వన్డేల్లో ఎంతో కాలంగా రెండో కీపర్గా కొనసాగుతున్న కార్తీక్కు చోటు లభించడంపై స్పందించాడు గంభీర్.
పంత్తో పోలిస్తే కార్తీక్ సరైన ప్రత్యామ్నాయమని సెలక్టర్లు భావించి ఉంటారని తెలిపాడు. కానీ సంజు శాంసన్ సరైన ఎంపికని నా ఆలోచన అన్నాడు. నాలుగో స్థానంలోనూ బ్యాటింగ్ చేయలగ సత్తా శాంసన్ సొంతమని స్పష్టం చేశాడు.
మంచి జట్టుతో భారత్ ప్రపంచకప్లో అడుగుపెడుతోందని.. వారికి మద్దతు తెలపాలని సూచించాడు. ఇప్పడు ఎవరు ఎంపికయ్యారు.. ఎవరు కాలేదన్నదీ కాదు ప్రపంచకప్ తేవాలన్నదే లక్ష్యం కావాలని ఉద్ఘాటించాడు.
ఇవీ చూడండి.. తెలుగు ఆటగాడు ప్రపంచకప్ ఆడి 20 ఏళ్లు..
