టీమ్ఇండియా ఆల్రౌండర్ రవీంద్ర జడేజాపై ఆస్ట్రేలియా బ్యాట్స్మన్ స్టీవ్ స్మిత్ ప్రశంసలు కురిపించాడు. క్రికెట్లో ప్రస్తుతం ఉన్న ఆటగాళ్లలో జడేజా ఉత్తమ ఫీల్డర్ అని కితాబిచ్చాడు. అలాగే టీమ్ఇండియా క్రికెటర్లలో కేఎల్ రాహుల్ బ్యాటింగ్ శైలి తనను ఆకట్టుకుందని వెల్లడించాడు. తాజాగా ఇన్స్టా లైవ్లో పాల్గొన్న స్మిత్ పలు ప్రశ్నలకు సమాధానాలిచ్చాడు.
ప్రస్తుత ఆటగాళ్లలో ఉత్తమ ఫీల్డర్ ఎవరని స్మిత్ను అడిగినప్పుడు.. రవీంద్ర జడేజా అని సమాధానమిచ్చాడు. తనలో ఉన్న ప్రత్యేకమైన ఫీల్డింగ్ వ్యూహాలతో గుర్తింపు పొందిన జడేజా అనేక మంది ఆటగాళ్ల ప్రశంసలతో పాటు గౌరవాన్ని పొందాడు. ధోనీ గురించి మరో నెటిజన్ అడగ్గా.."లెజెండ్. మిస్టర్ కూల్" అని.. కోహ్లీ విషయానికొస్తే బ్యాటింగ్ సామర్థ్యంలో ఉత్తమ ఆటగాడని కొనియాడాడు స్మిత్.
ట్రోఫీ నెగ్గాలంటే కష్టం
ఐపీఎల్ తనకు ఇష్టమైన టోర్నీ అని.. ఆ ట్రోఫీని నెగ్గలాంటే చాలా కష్టమని అభిప్రాయపడ్డాడు స్టీవ్ స్మిత్. ఎందుకంటే ఇందులో ప్రపంచంలోని ఉత్తమ ఆటగాళ్లందరితో పోటీ పడాలని తెలిపాడు. ఈ టోర్నీలో రాజస్థాన్ రాయల్స్ జట్టుకు ప్రాతినిధ్యం వహిస్తున్నాడు స్మిత్. భారత్పై ఈ ఏడాది చివర్లో జరగనున్న బోర్డర్-గావస్కర్ టెస్టు సిరీస్ కోసం ఉత్కంఠగా ఎదురుచూస్తున్నట్లు వెల్లడించాడు.
ఇదీ చూడండి... 'టీమ్ఇండియా కోచ్గా అలా ఎంపికయ్యా'
