భారత్, పాకిస్థాన్ క్రికెటర్లతో ఓ జట్టును తయారు చేసినట్లు తెలిపాడు పాకిస్థాన్ మాజీ క్రికెటర్ రమీజ్ రాజా. ఈ కూర్పు సమకూర్చడంలో కష్టతరమైనా తన కుమారుడు చెప్పిన లాజిక్ను ఉపయోగించి భారత్, పాక్ ఎలెవన్ జట్టును రూపొందించినట్లు పేర్కొన్నాడు. టీమ్ఇండియా మాజీ కెప్టెన్ సునీల్ గావస్కర్తో కలిసి ఫేస్బుక్ లైవ్ సెషన్లో ఈ విషయాన్ని వెల్లడించాడు.
"నా కుమారుడితో బాగా చర్చించాను. అత్యుత్తమ ఆటగాళ్ల నుంచి ఉత్తమ జట్టును ఎంపిక చేయడం కష్టంగా అనిపించింది. కానీ, చివరికి అది సాధ్యమైంది. పాకిస్థాన్ బౌలర్లు, భారత బ్యాట్స్మెన్లతో కలిపితే ఓ అద్భుతమైన జట్టు తయారైంది".
-రమీజ్ రాజా, పాకిస్థాన్ మాజీ క్రికెటర్
జట్టులో భారత దిగ్గజ క్రికెటర్లు వీరేంద్ర సెహ్వాగ్, సునీల్ గావస్కర్లను ఓపెనింగ్ బ్యాట్స్మెన్లుగా తీసుకున్నాడు. ఆ తర్వాత వరుసగా విరాట్ కోహ్లీ, సచిన్ తెందూల్కర్, రాహుల్ ద్రవిడ్, ఎంఎస్ ధోనీ (వికెట్ కీపర్)లు ఉన్నారు. అయితే రమీజ్ రాజా స్వతహాగా పాకిస్థాన్ క్రికెటర్ అవ్వడం వల్ల ఆ జట్టుకు ప్రస్తుత పాకిస్థాన్ ప్రధాని, మాజీ క్రికెటర్ ఇమ్రాన్ఖాన్ను కెప్టెన్గా ఎంపిక చేశాడు.
రమీజ్ రాజా ఎంపిక చేసిన భారత్, పాక్ ఎలెవన్ జట్టు
వీరేంద్ర సెహ్వాగ్, సునీల్ గావస్కర్, విరాట్ కోహ్లీ, సచిన్ తెందూల్కర్, రాహుల్ ద్రవిడ్, ఎంఎస్ ధోనీ, ఇమ్రాన్ ఖాన్, వసీం అక్రమ్, వఖార్ యూనిస్, అనిల్ కుంబ్లే, సక్లయిన్ ముస్తాక్.
ఇదీ చూడండి.. స్టీవ్ వా అత్యంత స్వార్థపరుడు: షేన్ వార్న్
