జాతీయ క్రికెట్ అకాడమీ(ఎన్సీఏ) అధ్యక్షుడిగా ఎంపికైన భారత మాజీ ఆటగాడు రాహుల్ ద్రవిడ్... జులై 8న పదవీ బాధ్యతలు చేపట్టారు. ప్రస్తుతం అండర్-19, భారత్-ఏ జట్టుకు కోచ్‌గా సేవలందిస్తున్న మిస్టర్ వాల్... ఈ హోదాలో చేరేందుకు బీసీసీఐ నిబంధన అడ్డుగా నిలిచింది. ఏ వ్యక్తి పరస్పర విరుద్ధ ప్రయోజనాల నిబంధన ప్రకారం రెండు పదవుల్లో ఉండకూడదు.
ఇప్పటివరకు ఇండియా సిమెంట్స్లో ఉపాధ్యక్ష పదవిలో ఉన్న ద్రవిడ్... తాజాగా ఆ హోదా నుంచి రెండేళ్ల కాలానికి తాత్కాలిక విరామం తీసుకున్నారు. ఫలితంగా ఎన్సీఏలో చేరేందుకు అడ్డంకులు తొలగిపోయాయి.
" జాతీయ జట్టులోకి పురుష, మహిళ క్రీడాకారులను తయారుచేసేందుకు ద్రవిడ్ పనిచేస్తారు. వాళ్ల పర్యవేక్షణ, శిక్షణ, తర్ఫీదుతో పాటు ఆటగాళ్లు, జూనియర్ కోచ్లు, సిబ్బందికి స్ఫూర్తి నింపేందుకు ఆయన సేవలు ఉపయోగపడతాయి. ఎన్సీఏతో పాటు భారత్-ఏ, అండర్-19, అండర్-23 జట్లకు పర్యవేక్షణ బాధ్యతలు రాహుల్ ద్రవిడ్ అధీనంలో ఉంటాయి ".
--బీసీసీఐ
ఎన్సీఏ అధ్యక్ష పదవికి కాలపరిమితిని బీసీసీఐ ఇంకా ప్రకటించలేదు. ద్రవిడ్ నేతృత్వంలోనే ఎందరో ఆటగాళ్లు జాతీయ జట్టులోకి వచ్చారు. ఈ లెజెండరీ ఆటగాడి పర్యవేక్షణలోనే పంత్ అండర్-19 జట్టులో ఆడటం, ప్రస్తుతం జరుగుతున్న ప్రపంచకప్లోనూ చోటు దక్కించుకోవడం విశేషం.
ఇది చదవండి: 'బాటిల్క్యాప్ ఛాలెంజ్' యువరాజ్ స్టైల్లో...
