కరోనా ప్రభావంతో ఆస్ట్రేలియాలో జరగాల్సిన టీ20 ప్రపంచకప్ వాయిదా పడే సూచనలు ఎక్కువగా కనిపిస్తున్నాయి. సరిగ్గా అదే సమయంలో ఐపీఎల్ను నిర్వహించాలని బీసీసీఐ భావిస్తోంది. ఒకవేళ ఇదే జరిగితే ఎన్నో ప్రశ్నలకు సమాధానాలు చెప్పాల్సి ఉంటుందని పాక్ మాజీ కెప్టెన్ ఇంజమామ్ ఉల్ హక్ అన్నాడు.
"టీ20 ప్రపంచకప్ జరిగే సమయంలోనే ఇండియన్ ప్రీమియర్ లీగ్, భారత్-ఆస్ట్రేలియా సిరీస్ నిర్వహించనున్నారని వదంతులు వినిపిస్తున్నాయి. ఒకవేళ ఇదే జరిగితే ప్రపంచకప్ జరపడం కష్టమవుతుంది. బలమైన భారత క్రికెట్ బోర్డు, ఐసీసీని నియంత్రించాలని చూస్తోంది. మరోవైపు కరోనా వల్ల టీ20 ప్రపంచకప్ జరపలేమని ఆస్ట్రేలియా అంటోంది. ఒకవేళ ఇదే జరిగి, ఐపీఎల్ నిర్వహిస్తే చాలా ప్రశ్నలు తలెత్తుతాయి" -ఇంజమామ్ ఉల్ హక్, పాక్ మాజీ కెప్టెన్, సెలక్టర్
పాక్ మాజీ కెప్టెన్ ఇంజిమామ్
షెడ్యూల్ ప్రకారం ఈ ఏడాది అక్టోబరు 18 నుంచి నవంబరు 15 మధ్య టీ20 ప్రపంచకప్ ఆస్ట్రేలియాలో జరగాలి. ప్రస్తుతం కరోనా కోరలు చాస్తుండటం వల్ల 16 జట్లను ఒక్కచోటకు తెచ్చి, మ్యాచ్లు నిర్వహించలేమని క్రికెట్ ఆస్ట్రేలియా ఇప్పటికే చెప్పేసింది. అయినప్పటికీ ఈ విషయమై ఎలాంటి నిర్ణయాన్ని ఐసీసీ తీసుకోలేదు.
అయితే ఐసీసీ, ప్రైవేట్ లీగ్లకు ఎక్కువ ప్రాధాన్యతను ఇవ్వకూడదని అన్నాడు ఇంజమామ్. ఇదే జరిగితే యువక్రికెటర్లు.. అంతర్జాతీయ టోర్నీల కంటే వాటి వైపే మొగ్గుచూపుతారని చెప్పాడు.
ఈ ఏడాది జరగాల్సిన ఆసియాకప్ విషయంలో ఇంకా సందిగ్ధత అలానే ఉంది. పాక్ ఆతిథ్యమిస్తే భారత జట్టు రానని చెప్పిన నేపథ్యంలో తటస్థ వేదికలో మ్యాచ్లు నిర్వహించాలని పాకిస్థాన్ క్రికెట్ బోర్డు భావిస్తోంది.
