న్యూజిలాండ్లో వచ్చే నెలలో జరిగే టీ20 సిరీస్ కోసం ఆస్ట్రేలియా తమ జట్టును ప్రకటించగానే అందరి దృష్టి తన్వీర్ వైపే మళ్లింది. ఎవరా ఆటగాడు? అతని ప్రస్థానం ఏమిటీ? అనే ప్రశ్నలు రేకెత్తాయి. జలంధర్ నుంచి 20 కిలోమీటర్ల దూరంలో ఉండే రహీంపూర్ కాలా సంఘియాన్కు చెందిన జోగా 1997లో సిడ్నీకి వలస వెళ్లాడు. అతని కొడుకే ఈ తన్వీర్.
అక్కడ ట్యాక్సీ డ్రైవర్గా పనిచేసే అతను.. పదేళ్ల వయసులో తన కొడుకును అక్కడి ఓ క్రికెట్ క్లబ్లో చేర్పించాడు. అయితే తన్వీర్కు ఆ ఆట మీద ఇష్టం అనుకోకుండా ఏర్పడింది. స్థానిక గురుద్వారాలో వాలీబాల్ సెషన్ల విరామ సమయంలో క్రికెట్ ఆడేవాడు. వేసవి సెలవుల్లో భారత్లోని తన గ్రామానికి వచ్చినప్పుడు.. ఇక్కడ క్రికెట్లో నేర్చుకున్న టెక్నిక్లను తిరిగి ఆస్ట్రేలియా వెళ్లాక అమలుపరిచేవాడు. అలా మొదలైన తన క్రికెట్ ప్రస్థానం ఘనంగా సాగుతోంది. పాఠశాల స్థాయిలో, వివిధ వయసు విభాగాల్లో ఉత్తమ ప్రదర్శనతో ఆకట్టుకున్నాడు.
గతేడాది అండర్-19 ప్రపంచకప్లో ఆస్ట్రేలియా తరఫున విజయవంతమైన బౌలర్గా నిలిచాడు. బిగ్బాష్ లీగ్లో అరంగ్రేటం చేసి సిడ్నీ థండర్స్ తరఫున ఆడిన అతను.. ఈ సీజన్లో అత్యధిక వికెట్లు (21 వికెట్లు) తీసిన మూడో బౌలర్గా నిలిచాడు. ఈ క్రమంలో ఇప్పటికే ఉత్తమ స్పిన్నర్లుగా పేరు తెచ్చుకున్న రషీద్ఖాన్, ఆడమ్ జంపాలను అతను వెనక్కు నెట్టడం విశేషం.
పవర్ ప్లేలో, చివరి ఓవర్లలో బౌలింగ్ చేసే అతను ప్రత్యర్థి బ్యాట్స్మెన్ పరుగులు చేయకుండా కట్టడి చేశాడు. ఇప్పుడీ ప్రదర్శనతోనే తొలిసారి ఆస్ట్రేలియా టీ20 జట్టుకు ఎంపికయ్యాడు. అంచెలంచెలుగా ఎదిగిన అతను ఇప్పటికే ఓ మంచి లెగ్స్పిన్నర్గా గుర్తింపు తెచ్చుకున్నాడు. ప్రస్తుత ఆసీస్ సీనియర్ స్పిన్నర్ లైయన్కు తన్వీరే సరైన వారసుడంటూ అతనిపై ప్రశంసలు వెల్లువెత్తుతున్నాయి.
అయితే ఇప్పుడిప్పుడే అంతర్జాతీయ కెరీర్ మొదలెట్టనున్న అతణ్ని.. ఇప్పటికే గొప్ప స్పిన్నర్లుగా ఎదిగిన వాళ్లతో పోల్చడం సరికాదు. జాతీయ జట్టు తరఫున కూడా తన్వీర్ ఇదే ప్రదర్శన కొనసాగించాల్సిన అవసరం ఉంది. అలా అయితేనే జట్టులో సుస్థిర స్థానం దక్కుతుంది.
ఇదీ చదవండి: టీమ్ఇండియా క్రికెటర్లకు కొవిడ్ నెగెటివ్‌
