కరోనా విరామం తర్వాత సొంతగడ్డపై తొలిసారిగా జరుగుతున్న అంతర్జాతీయ వన్డే సిరీస్‌ను పాకిస్థాన్ విజయంతో మొదలెట్టింది. మూడు వన్డేల సిరీస్‌లో భాగంగా శుక్రవారం తొలి మ్యాచ్‌లో ఆ జట్టు 26 పరుగుల తేడాతో ప్రత్యర్థిని ఓడించింది. మొదట బ్యాటింగ్‌ చేసిన పాక్ 50 ఓవర్లలో 8 వికెట్లకు 281 పరుగులు చేసింది. ఓపెనర్‌ ఇమాముల్‌ హక్‌ (58), హారిస్ సొహైల్‌ (71) అర్ధశతకాలతో రాణించారు. ప్రత్యర్థి బౌలర్లలో ముజరబాని (2/39), చిసొరో (2/31) రాణించారు. ఛేదనలో జింబాబ్వే 49.4 ఓవర్లలో 255 పరుగులకు ఆలౌటైంది. టేలర్ (112; 116 బంతుల్లో 11×4, 3×6) శతకంతో సత్తాచాటడం, వెస్లీ (55) కూడా రాణించడం వల్ల ఓ దశలో పాక్‌కు షాకిచ్చేలా కనిపించిన జింబాబ్వేను షహీన్ (5/49), రియాజ్ (4/41) దెబ్బ తీశారు.
మళ్లీ నవ్వులపాలు
ఫీల్డింగ్లో బద్దకం, వికెట్ల మధ్య సమన్వయ లోపం లాంటి అవలక్షణాలు పాకిస్థాన్ క్రికెట్ జట్టు కొనసాగిస్తూనే ఉంది. తాజాగా జింబాబ్వేతో వన్డేలోనూ రనౌట్ కాకుండా ఉండేందుకు ఆ జట్టు బ్యాట్స్మెన్ ఇద్దరూ ఒకే ఎండ్కు పరుగెత్తడం నవ్వుల పాలైంది. అందుకు సంబంధించిన వీడియోలు, ఫొటోలు సామాజిక మాధ్యమాల్లో చక్కర్లు కొడతున్నాయి. ఇన్నింగ్స్ 26వ ఓవర్ అయిదో బంతిని పాయింట్ దిశగా ఆడిన ఇమామ్ సింగిల్ తీసేందుకు ప్రయత్నించగా.. నాన్స్ట్రైకర్ హారిస్ వెంటనే స్పందించాడు. కానీ, బంతిని మాత్రమే చూస్తూ పరుగెత్తిన ఇమామ్.. పాయింట్లో ఫీల్డర్ డైవ్ చేసి బంతిని ఆపడం వల్ల తిరిగి క్రీజువైపు మళ్లాడు.
అలా ఇద్దరు బ్యాట్స్మెన్ ఒకేవైపుగా క్రీజు చేరేందుకు పరుగులు పెట్టారు. ఇమామ్ క్రీజులో బ్యాట్ పెట్టేందుకు డైవ్ చేయడం గమనార్హం. ఆ బంతిని వికెట్ కీపర్ అందుకోలేకపోయాడు. అతని వెనుక ఉన్న ఫీల్డర్ దాన్ని అందుకున్నాడు. బౌలర్కు విసరడం వల్ల అతను రనౌట్ చేశాడు. మూడో అంపైర్ ఇమామ్ను ఔట్గా ప్రకటించాడు. ఇలా పరుగెత్తడం పాక్ ఆటగాళ్లకు మాత్రమే చెల్లుతుందని, కొన్ని విషయాలు ఎప్పటికీ మారవని, నవ్వుకోవడానికి ఓ కారణం దొరికిందంటూ నెటిజన్లు కామెంట్లు చేస్తున్నారు.
