పాకిస్థాన్ క్రికెట్ టెస్టు కెప్టెన్గా అజహర్ అలీ స్థానంలో బాబర్ అజామ్ను పాకిస్థాన్ క్రికెట్ బోర్డు ఎంపిక చేసింది. ఇప్పటికే వన్డే, టీ20 జట్లకు నాయకుడిగా వ్యవహరిస్తున్న బాబర్ అజామ్కు తాజాగా టెస్టు పగ్గాలను అప్పగించారు.
"బాబర్ అజామ్ చిన్న వయసులోనే భవిష్యత్ తరానికి నాయకుడిగా ఎదిగాడు. ఆటలో అతడి ప్రదర్శన, పురోగతి కారణంగా గతేడాది వైట్ బాల్ కెప్టెన్గా ఎంపికయ్యాడు. అజామ్ తన స్థిరమైన పనితీరు, నాయకత్వ నైపుణ్యాలతో కొత్త బాధ్యతను తీసుకోవడానికి సిద్ధంగా ఉన్నాడు. భవిష్యత్ గురించి ఆలోచిస్తున్న క్రమంలో బాబర్ను కెప్టెన్గా నియమించడం మంచిదని నిర్ణయించాం. తద్వారా ప్రతి మ్యాచ్లోనూ అతడు బలోపేతం అవుతాడు".
- ఎహ్సాన్ మణి, పాకిస్థాన్ క్రికెట్ బోర్డు ఛైర్మన్
మంగళవారం సాయంత్రం అజార్ అలీతో పీసీబీ ఛైర్మన్ ఎహ్సాన్ మణి సమావేశమైన తర్వాత ఈ నియామకాన్ని ధ్రువీకరించారు. ఇటీవలే ఇంగ్లాండ్లో జరిగిన మూడు మ్యాచ్ల టెస్టు సిరీస్లో 1-0 తేడాతో పాక్ ఓడిపోయింది.
ఐసీసీ ప్రపంచ టెస్టు ఛాంపియన్షిప్లో భాగంగా న్యూజిలాండ్తో జరగనున్న సిరీస్కు కెప్టెన్గా బాబర్ అజామ్ వ్యవహరించనున్నాడు. మౌంట్ మౌంగనుయ్ వేదికగా డిసెంబరు 26-30న తొలి టెస్టు, క్రైస్ట్చర్చ్లో జనవరి 3-7 వరకు రెండో టెస్టు జరగనుంది.
