ఐపీఎల్​కు ఆతిథ్య​మిచ్చేందుకు కివీస్ సిద్ధం

ఇండియన్ ప్రీమియర్ లీగ్​ను ఆతిథ్యం ఇచ్చేందుకు సిద్ధంగా ఉన్నట్లు తెలిపింది న్యూజిలాండ్ క్రికెట్​ బోర్డు. ఇప్పటికే ​ టోర్నీ నిర్వహించేందుకు యూఏఈ, శ్రీలంక సిద్ధంగా ఉన్నాయి.

భారత్​లో కరోనా విజృంభిస్తోన్న నేపథ్యంలో ఐపీఎల్​ 13వ సీజన్​ను ఎక్కడ, ఎప్పుడు నిర్వహిస్తే సజావుగా సాగుతుందనే అంశంపై పరిశీలిస్తూనే ఉంది బీసీసీఐ. అయితే ఈ టోర్నీకి ఆతిథ్యమిచ్చేందుకు ఇప్పటికే శ్రీలంక, యూఏఈ దేశాలు ముందుకొచ్చాయి. తాజాగా ఈ రేసులోకి న్యూజిలాండ్​ వచ్చింది. తమ దేశంలో లీగ్​ను నిర్వహించేందుకు సిద్ధంగా ఉన్నట్లు తెలిపింది.

ఆటగాళ్ల సురక్షితమే ప్రాధాన్యత

న్యూజిలాండ్​ ఆతిథ్యం ప్రతిపాదనపై ఓ బీసీసీఐ అధికారి స్పందించారు. భారత్​లో కరోనా వల్ల టోర్నీ నిర్వహించడం సాధ్యంకాకపోతేనే విదేశీ గడ్డపై నిర్వహించేందుకు ప్రత్యామ్నయం చూస్తామని తెలిపారు. ఎక్కడ నిర్వహించిన ఆటగాళ్ల భద్రతే తమ తొలి ప్రాధాన్యతమని అన్నారు.

"స్వదేశంలోనే ఐపీఎల్​ నిర్వహించాలనేది మా తొలి ప్రాధాన్యం. ఒకవేళ కుదరకపోతే ప్రత్యామ్నయంగా విదేశీ గడ్డపై ఎక్కడ నిర్వహించాలనేది బీసీసీఐ కమిటీ నిర్ణయిస్తుంది. ఇప్పటికే యూఏఈ, శ్రీలంక, న్యూజిలాండ్​ దేశాలు ఆతిథ్యమివ్వడానికి ముందుకొచ్చాయి. కానీ ఎక్కడ నిర్వహించినా ఆటగాళ్ల భద్రతే మా తొలి ప్రాథాన్యత. దీనిపై రాజీపడేది లేదు"

-బీసీసీఐ అధికారి

గతంలో భారత్​లో లోక్​సభ ఎన్నికల సందర్భంగా 2009లో దక్షిణాఫ్రికా, 2014లో యూఏఈలో ఐపీఎల్​ను నిర్వహించారు. 2019లో మాత్రం తేదీల్లో మార్పులు చేసి స్వదేశంలోనే జరిపారు.

చైనా కంపెనీల స్పాన్సర్‌షిప్‌లు

జూన్‌ 15న గల్వాన్‌ లోయలో చైనాతో జరిగిన ఘర్షణలో 20 మంది భారత జవాన్లు అమరులయ్యారు. అప్పుడంతా భావోద్వేగం చెందడం వల్ల చైనా కంపెనీల స్పాన్సర్‌షిప్‌లను రద్దు చేసుకోవాలని బీసీసీఐని డిమాండ్‌ చేశారు. అయితే దీనిపై త్వరలోనే ఐపీఎల్​ పాలక మండలి సమావేశం జరిపి ఓ నిర్ణయం తీసుకుంటుందని బీసీసీఐ అధికారి తెలిపారు.

అక్టోబర్​-నవంబరులో ఆస్ట్రేలియా వేదికగా జరగాల్సిన టీ20 ప్రపంచకప్​ వాయిదా పడితే సెప్టెంబరులో ఐపీఎల్​ నిర్వహించాలని బోర్డు సన్నాహాలు చేస్తోంది. అయితే టీ20 ప్రపంచకప్​ నిర్వహణపై ఐసీసీ స్పష్టతనిచ్చిన తర్వాతే దీని విషయంలో నిర్ణయం తీసుకుంటుందని అధికారి తెలిపారు.

ఇది చూడండి :

దుబాయ్​ లేదా శ్రీలంకలో ఐపీఎల్​-13!