ప్రపంచకప్-2019 ఫైనల్ మ్యాచ్ ఆఖర్లో గప్తిల్ 'ఓవర్ త్రో'ను అంత త్వరగా మర్చిపోలేం. ఒక విధంగా ఇంగ్లాండ్ను విశ్వవిజేతగా నిలిచేలా చేసింది ఆ నాలుగు పరుగులే. ఈ అదనపు పరుగులపై పెద్ద చర్చే జరిగింది. తాజాగా ఇంగ్లీష్ ఆటగాడు బెన్ స్టోక్స్ ఈ అంశంపై స్పందించాడు. ఓవర్ త్రోలో వచ్చిన నాలుగు పరుగులను రద్దు చేయమని అంపైర్లను అడగాలనుకోలేదని చెప్పాడు.
"అక్కడ జరిగిన సంఘటన మొత్తం చూశా. 'పరుగులు రద్దు చేయమని అడగాలా' అని నన్ను నేను ప్రశ్నించుకున్నా. కానీ నా మనసు అందుకు అంగీకరించలేదు. అంపైర్లను అడగలేదు".
-బెన్ స్టోక్స్, ఇంగ్లాండ్ క్రికెటర్.
సూపర్ ఓవర్కు ముందు కేన్ విలియమ్సన్ను క్షమించమని అడిగానని చెప్పాడు స్టోక్స్.
"మ్యాచ్ టైగా ముగిసిన తర్వాత సూపర్ ఓవర్కు ముందు టామ్ లాథమ్ దగ్గరకు వెళ్లి క్షమించమని అడిగా. విలియమ్సన్ వైపు చూసి మన్నించమన్నా' . -బెన్ స్టోక్స్, ఇంగ్లాండ్ క్రికెటర్
అసలేం జరిగింది?
మెగాటోర్నీ ఫైనల్ చివరి ఓవర్లో కివీస్ ఆటగాడు గప్తిల్ వేసిన ఓవర్ త్రో కారణంగా బంతి బెన్ స్టోక్స్ బ్యాట్ను తాకి బౌండరీ వెళ్లింది. ఈ కారణంగా అదనంగా నాలుగు పరుగులు ప్రకటించాడు అంపైర్ ధర్మసేన. అప్పటికీ రెండో పరుగు పూర్తి చేస్తోన్న స్టోక్స్ ఖాతాలో ఆరు పరుగులు చేరాయి. సూపర్ ఓవర్లోనూ ఇరు జట్ల స్కోర్లు సమం అయ్యాయి. ఫలితంగా బౌండరీ కౌంట్ ద్వారా ఇంగ్లాండ్ విశ్వవిజేతగా నిలిచింది.
ఇది చదవండి: విచిత్ర బౌలింగ్ యాక్షన్.. నెట్టింట వైరల్
