ఆస్ట్రేలియాతో జరిగిన మూడో వన్డేలో తాను కీలక ఇన్నింగ్స్ ఆడటంలో భారత మాజీ కెప్టెన్ ధోనీ వ్యూహం దోహదపడిందని చెప్పాడు రవీంద్ర జడేజా. తన బ్యాటింగ్ మెరుగుపడటానికి ప్రధాన కారణం మహీనే అని తెలిపాడు.
"ధోనీ సుదీర్ఘకాలం టీమ్ఇండియా, చెన్నై సూపర్ కింగ్స్ జట్లకు ఆడాడు. అతను తొలుత భాగస్వామ్యం నిర్మించేందుకు ప్రాధాన్యం ఇచ్చి.. క్రీజులో కుదుటపడ్డాక భారీ షాట్లు ఆడతాడు. మహీ బ్యాటింగ్‌ను నేను ఎన్నోసార్లు చూశా.. అతనితో కలిసి ఆడా. మ్యాచ్ను చివరి ఓవర్ వరకు తీసుకెళ్లగలిగితే.. ఆఖరి 4-5 ఓవర్లలో భారీగా పరుగులు సాధించవచ్చని చెప్పేవాడు. అదే వ్యూహాన్ని హార్దిక్తో కలిసి మూడో వన్డేలో అమలు చేశా."
-రవీంద్ర జడేజా, టీమ్ఇండియా క్రికెటర్.
ఈ మ్యాచ్లో టాస్ గెలిచి బ్యాటింగ్ ఎంచుకున్న భారత్ ఆచితూచి ఆడింది. కానీ వెంటవెంటనే శిఖర్ ధావన్(16), శుభ్మన్ గిల్(33), కోహ్లీ(63), శ్రేయస్ అయ్యర్(19), కేఎల్ రాహుల్(5) వికెట్లను కోల్పోయింది. అదే సమయంలో చివర్లో వచ్చిన హార్దిక్ పాండ్యా(92*), రవీంద్ర జడేజా(66*) వీర విహారం చేశారు. చూడచక్కని షాట్లతో స్కోరు బోర్డును పరుగులు పెట్టించారు. ఆస్ట్రేలియా ముందు 303 పరుగుల లక్ష్యాన్ని ఉంచారు. అనంతరం కంగారూ జట్టు 289 పరుగులకు ఆలౌటై ఓటమి మూటగట్టుకుంది. ఈ సుదీర్ఘ పర్యటనలో భారత్-ఆసీస్ ఇంకా మూడు టీ20లు, నాలుగు టెస్టులు ఆడాల్సి ఉంది. డిసెంబర్ 4న తొలి టీ20 జరగనుంది.
ఇదీ చూడండి : 'టీ-20 సిరీస్కు ముందు గెలుపు ఉత్సాహాన్నిచ్చింది'
