ఆస్ట్రేలియా పర్యటనను విజయవంతంగా పూర్తి చేసుకుని స్వదేశానికి చేరుకున్న సిరాజ్.. తనకు తానే విలువైన బీఎమ్డబ్ల్యూ కారును బహుమతిగా ఇచ్చుకున్నాడు. సంబంధిత వీడియోను ఇన్స్టా స్టోరీస్లో పంచుకున్నాడు. ఆటో డ్రైవర్ కుమారుడు స్థాయి నుంచి సొంత బీఎమ్డబ్ల్యూ కొనే స్థాయికి చేరడంపై నెటిజన్లు ప్రశంసలు కురిపిస్తున్నారు.
ఆస్ట్రేలియా పర్యటనలో టెస్టులకు బ్యాకప్ బౌలర్గా ఎంపికైన సిరాజ్.. ఆ దేశంలో ఉండగానే తన తండ్రి మరణ వార్తను విన్నాడు. క్వారంటైన్లో ఉన్న అతడిని స్వదేశానికి వెళ్లేందుకు బీసీసీఐ అనుమతించింది. తాను దేశం తరఫున ఆడాలనేది తండ్రి కల అని, దానిని నెరవేర్చిన తర్వాతే ఇంటికి వెళ్తానని బోర్డుకు చెప్పాడు. దానిని నిజం చేస్తూ టెస్టు సిరీస్ను భారత్ గెలుచుకోవడంలో తన వంతు పాత్ర పోషించాడు. అందరితో శెభాష్ అనిపించుకుంటున్నాడు.
తొలి టెస్టులో షమి గాయపడడం వల్లే సిరాజ్కు జట్టులో చోటు దక్కింది. ఆ అవకాశాన్ని రెండు చేతులా అందిపుచ్చుకున్న ఇతడు.. మెల్బోర్న్లో 5 వికెట్లు తీసి గెలుపులో సహాయపడ్డాడు. సిడ్నీ మ్యాచ్లో ఆసీస్ ప్రేక్షకుల నుంచి జాత్యాంహకార వ్యాఖ్యలు ఎదుర్కొన్నా సరే వాటిని తట్టుకుని నిలబడి, రెండు వికెట్లు తీశాడు. నిర్ణయాత్మక బ్రిస్బేన్ టెస్టు తొలి ఇన్నింగ్స్లో ఒక వికెట్.. రెండో ఇన్నింగ్స్లో ఐదు వికెట్లు పడగొట్టి భారత్కు మరపురాని విజయాన్ని అందించాడు. పర్యటన ముగించుకుని స్వదేశానికి రాగానే నేరుగా తన తండ్రి సమాధి వద్దకు వెళ్లి భావోద్వేగానికి లోనయ్యాడు.
సిరాజ్ తండ్రి హైదరాబాద్లో ఓ ఆటో డ్రైవర్. తన కొడుకు తనలా కాకుండా గొప్పగా బతకాలని ఆయన కలలు కన్నారు. సిరాజ్ క్రికెట్లో రాణించేందుకు ఆయన అహర్నిశలు శ్రమించారు. ఆసీస్ పర్యటనతో ఆయన కల నిజమైంది. ఇప్పుడు బీఎమ్డబ్ల్యూ కారు కొన్న సిరాజ్.. దానిని తనకు కానుకగా ఇచ్చుకున్నాడు. ఆటోవాలా కుమారుడి స్థాయి నుంచి బీఎమ్డబ్ల్యూ యజమాని వరకు సాగిన సిరాజ్ ప్రస్థానం ఎందరికో స్ఫూర్తిదాయకం.
ఇదీ చూడండి: సిరీస్‌లో తీసిన ప్రతి వికెట్ నాన్నకు అంకితం: సిరాజ్
