ఐసీసీ మహిళా టీ20 ప్రపంచకప్ సెమీఫైనల్కు రిజర్వ్డే కేటాయించకపోవటాన్ని ఖండించాడు ఆస్ట్రేలియా మాజీ ఆటగాడు మార్క్ వా. దీనివల్ల జీవితకాలంలోనే అతిపెద్ద మ్యాచ్ ఆడే అవకాశాన్ని కొందరు క్రికెటర్లు కోల్పోయారని ఆవేదన వ్యక్తం చేశాడు.
గురువారం జరగాల్సి ఉన్న తొలి సెమీస్లో భారత్‌, ఇంగ్లాండ్ తలపడాల్సి ఉంది. సిడ్నీలో కుండపోతగా వర్షం కురవడం వల్ల ఒక్క బంతీ పడకుండానే ఈ మ్యాచ్ రద్దైంది. వర్షం కురిసే అవకాశాలు ఉండటం వల్ల రిజర్వు డే కేటాయించాలని క్రికెట్ ఆస్ట్రేలియా ముందుగానే అంతర్జాతీయ క్రికెట్ మండలిని కోరింది. అయినప్పటికీ కుదరదని ఐసీసీ చెప్పడం గమనార్హం. దీంతో లీగ్‌ దశలో నాలుగు విజయాలతో 8 పాయింట్లు సాధించిన టీమిండియా ఫైనల్‌కు చేరింది. మూడు విజయాలే సాధించిన ఇంగ్లాండ్ నిరాశగా నిష్ర్కమించింది.
"ఈ ఏడాది అతిపెద్ద క్రికెట్ టోర్నీ నాకౌట్‌ మ్యాచ్లకు ఐసీసీ రిజర్వు డే కేటాయించకపోవడం పూర్తిగా అర్థరహితం. దీనివల్ల జీవితకాలంలో అతిపెద్ద మ్యాచ్ ఆడే అవకాశాన్ని కొందరు క్రికెటర్లు కోల్పోయారు."
- మార్క్ వా, ఆస్ట్రేలియా మాజీ ఆటగాడు
దీనికి కామన్‌ సెన్స్‌ అనే హ్యాష్‌ట్యాగ్‌ను జత చేశాడు. మాజీ క్రికెటర్లు, అభిమానులు అతడి వ్యాఖ్యలతో ఏకీభవిస్తున్నారు.
వాతావరణం కారణంగా మ్యాచ్ జరగకపోవడం దురదృష్టకరమని టీమిండియా సారథి హర్మన్‌ప్రీత్‌ కౌర్‌ తెలిపింది. భవిష్యత్తులోనైనా రిజర్వు డే ఉంటే బాగుంటుందని పేర్కొంది. అన్ని మ్యాచ్లు గెలవకుండా సెమీస్లో ఆడే అవకాశం లేకపోతే కష్టమని తాము ముందే ఊహించామని వెల్లడించింది. ప్రపంచకప్‌ను ఇలా ముగించడం చిరాకు కలిగించిందని ఇంగ్లాండ్ సారథి హేథర్‌ నైట్‌ తెలిపింది. లీగ్‌ దశలో దక్షిణాఫ్రికాపై ఓడిపోవడం చేటు చేసిందని ఆవేదన వ్యక్తం చేసింది.
ఇదీ చూడండి.. ఇంగ్లాండ్కు అప్పుడు వరం.. ఇప్పుడు శాపం
