వివాహం ముందు రోజు కుటుంబ సభ్యులందరూ పెళ్లిపనుల్లో మునిగిపోవడం సహజం. ముఖ్యంగా వధూవరులైతే ఆ సందడిని ఆస్వాదిస్తూ.. క్షణం తీరికలేకుండా గడిపేస్తారు. కానీ మనీశ్ పాండే మాత్రం రేపు పెళ్లి అనగా.. బ్యాట్‌ పట్టి మైదానంలో దిగాడు. 'ముస్తాక్ అలీ' టోర్నీలో భాగంగా తమిళనాడుతో జరిగిన ఫైనల్ మ్యాచ్లో సారథిగా కర్ణాటక జట్టును నడిపించాడు. అజేయ అర్ధశతకంతో జట్టు విజయంలో కీలక పాత్ర పోషించాడు. సినీ నటి అశ్రిత శెట్టితో మనీశ్ వివాహం సోమవారం జరగనుంది. పెళ్లికి ఒక రోజు ముందు కూడా మనీశ్ మ్యాచ్ ఆడడం విశేషం. ఫైనల్ మ్యాచ్ కావడం వల్ల కెప్టెన్‌గా జట్టులో స్ఫూర్తి నింపాల్సిన బాధ్యత భుజాలకెత్తుకున్న అతను మైదానంలో దిగడం ఆటపై అతనికున్న ప్రేమను చాటుతోంది.
కర్ణాటక రికార్డు
దేశవాళీ టీ20 టోర్నీ 'సయ్యద్‌ ముస్తాక్ అలీ' ట్రోఫీకి ఈ సీజన్‌లో సిసలైన ముగింపు లభించింది. హోరాహోరీగా సాగుతూ.. తీవ్ర ఉత్కంఠ రేపిన ఫైనల్ మ్యాచ్లో కర్ణాటక విజేతగా నిలిచింది. ఆదివారం చివరి బంతికి ఫలితం తేలిన తుదిపోరులో కర్ణాటక ఒక్క పరుగు తేడాతో తమిళనాడుపై విజయం సాధించింది. ఫలితంగా ముస్తాక్ అలీ టోర్నీ చరిత్రలో తొలిసారి డిఫెండింగ్ టైటిల్ నిలబెట్టుకున్న జట్టుగా రికార్డు సృష్టించింది. గతేడాది కూడా కర్ణాటక టైటిల్ నెగ్గింది.
వరుసగా రెండేళ్లు
గతేడాది దేశవాళీ టోర్నీలో సత్తాచాటిన కర్ణాటక ఈ ఏడాది మెరుగ్గా రాణించింది. 2018లో జరిగిన విజయ్ హజారే ట్రోఫీ, ముస్తాక్ అలీ టోర్నీలను గెలిచిన కర్ణాటక.. ఈ ఏడాది టైటిళ్లు నెగ్గింది.
మొదట బ్యాటింగ్‌ చేసిన కర్ణాటక 20 ఓవర్లలో 5 వికెట్లకు 180 పరుగులు చేసింది. కెప్టెన్‌ మనీశ్ పాండే (60; 45 బంతుల్లో 4×4, 2×6) అజేయ అర్ధశతకంతో రాణించాడు. ప్రత్యర్థి బౌలర్లలో రవిచంద్రన్‌ అశ్విన్‌ (2/34)తో పాటు మురుగన్‌ అశ్విన్‌ (2/33) కూడా మెరిశాడు. అనంతరం ఛేదనలో తమిళనాడు 20 ఓవర్లలో 6 వికెట్లకు 179 పరుగులు చేసింది. బాబా అపరాజిత్‌ (40), విజయ్ శంకర్‌ (44) పోరాడారు. రోనిత్‌ మోర్‌ (2/32) ఆ జట్టును కట్టడి చేశాడు.
ఇవీ చూడండి.. వరుసగా రెండో ఏడాది 'ముస్తాక్ అలీ' కర్ణాటకదే
