ఇంగ్లాండ్తో జరిగిన రెండో వన్డేలో ఘోర ఓటమి చవిచూసింది టీమ్ఇండియా. మొదట బ్యాటింగ్ చేసి 336 పరుగుల భారీ స్కోర్ సాధించినా.. ఆ లక్ష్యాన్ని కాపాడుకోలేకపోయిన భారత్కు పరాభవం తప్పలేదు. ఇంగ్లాండ్ బ్యాట్స్మెన్ బాదుడు ముందు టీమ్ఇండియా బౌలర్లు తేలిపోయారు. అయితే ఈ మ్యాచ్తో పాటు మొదటి వన్డేలోనూ హార్దిక్ పాండ్యాకు బౌలింగ్ చేసే అవకాశం ఇవ్వలేదు. దీనిపై స్పందించిన కోహ్లీ.. భవిష్యత్ టోర్నీలను దృష్టిలో ఉంచుకుని హార్దిక్పై ఎక్కువ భారం పడకూడదనే అలా చేశామని తెలిపాడు.
"మంచి స్కోర్ సాధించామనుకున్నాం. రెండు అత్యుత్తమ జట్ల మధ్య మ్యాచ్ జరుగుతున్నపుడు ఏదో ఒక జట్టు ఉత్తమ ప్రదర్శన చేయడం ఖాయం. గత మ్యాచ్లో మేము గొప్పగా పుంజుకున్నాం. ఈసారి ఇంగ్లాండ్ మాకు అలాంటి అవకాశం ఇవ్వలేదు. పని భారం తగ్గించడం కోసమే వన్డేల్లో హార్దిక్కు బౌలింగ్ ఇవ్వట్లేదు. టీ20ల్లో అతడిని ఉపయోగించుకున్నాం. త్వరలోనే ఇంగ్లాండ్లో టెస్టు క్రికెట్ ఆడనున్నాం. హార్దిక్ ఫిట్గా ఉండటం మాకు అవసరం."
-కోహ్లీ, టీమ్ఇండియా సారథి
ఈ మ్యాచ్లో మొదట బ్యాటింగ్ చేసిన టీమ్ఇండియా నిర్ణీత 50 ఓవర్లలో 6 వికెట్ల నష్టానికి 336 పరుగులు చేసింది. కేఎల్ రాహుల్ (108) శతకంతో రాణించగా కోహ్లీ (66), పంత్(77)లు అర్ధశతకాలతో మెరిశారు. అనంతరం బ్యాటింగ్కు దిగిన ఇంగ్లాండ్ ప్రారంభం నుంచే భారత బౌలర్లపై ఎదురుదాడికి దిగింది. ముఖ్యంగా బెయిర్స్టో బౌండరీల వర్షం కురిపించాడు. ఇతడు 112 బంతుల్లో 124 పరుగులు చేయగా.. బెన్ స్టోక్స్ 52 బంతుల్లో 99 పరుగులతో విధ్వంసం సృష్టించాడు. దీంతో మ్యాచ్ ఇంగ్లాండ్ వశమైంది.
