భారత క్రికెట్ జట్టులో స్పిన్నర్లు అంటే అశ్విన్-జడేజా గుర్తొచ్చేవారు ఒకప్పుడు. ప్రస్తుతం ఆ స్థానాన్ని చాహల్- కుల్దీప్ జోడీ భర్తీ చేసింది. కొన్నేళ్లుగా వీరిద్దరూ టీమిండియా విజయాల్లో కీలక పాత్ర పోషిస్తున్నారు. ఈ జంట అరంగేట్రం చేసినప్పటి నుంచి 159 వికెట్లు తీశారు. దక్షిణాఫ్రికా, ఆస్ట్రేలియాతో జరిగిన సిరీస్ల్లో వీరిద్దరూ బంతితో మాయ చేశారు. ధోనీ, కోహ్లీ, రోహిత్ శర్మ ఇచ్చిన విలువైన సలహాలే ఇందుకు కారణమని చెప్పాడు యజ్వేంద్ర చాహల్.
"కుల్దీప్ నాకు చాలా ఏళ్ల నుంచి తెలుసు. మేమిద్దరం మ్యాచ్లో పిచ్ పరిస్థితులు బట్టి ఎక్కడ బంతి వేయొచ్చా అని కొన్నిసార్లు ధోనీభాయ్ సలహాలు తీసుకుంటాం. అదే విధంగా కోహ్లీ, రోహిత్ శర్మ.. మా బౌలింగ్ మెరుగుపర్చుకునేందుకు సహయపడ్డారు. మా విజయాల్లో ఈ ముగ్గురి పాత్ర కీలకమైనది." - యజ్వేంద్ర చాహల్, టీమిండియా బౌలర్
ఇటీవలే జరిగిన ఐపీఎల్లో బెంగళూరు తరఫున ఆకట్టుకున్నాడు చాహల్. ఈ టోర్నీలో ఆడిన చాలా మంది క్రికెటర్స్ ప్రపంచకప్లోనూ ఎదురవుతారని చెప్పాడీ స్పిన్ బౌలర్. వారికి అడ్డుకట్ట వేసేందుకు ఇది తనకెంతో ఉపయోగపడుతుందని తెలిపాడు.
