రాజస్థాన్ రాయల్స్తో జరుగుతున్న ఐపీఎల్ మ్యాచ్లో... మొదట బ్యాటింగ్కు దిగిన పంజాబ్ కింగ్స్ ఎలెవన్ జట్టు...184 పరుగులు సాధించింది. టాస్ ఓడి బ్యాటింగ్కు దిగిన కింగ్స్ ఎలెవన్కి ఆదిలోనే ఎదురుదెబ్బ తగిలింది. మొదటి ఓవర్లోనే కేఎల్ రాహుల్ (4) పెవిలియన్ బాట పట్టాడు. మయాంక్ అగర్వాల్ 22 పరుగులు చేసి అవుటయ్యాడు. అనంతరం వచ్చిన సర్ఫరాజ్ ఖాన్తో కలిసి గేల్ స్కోర్ బోర్డును పరుగులు పెట్టించాడు. వీరిద్దరూ ఎడాపెడా బౌండరీలు బాదుతూ విధ్వంసం సృష్టించారు. 47 బంతుల్లో 8 బౌండరీలు, 4 సిక్సులు బాదిన గేల్...79 పరుగులు చేశాడు. స్టోక్స్ బౌలింగ్లో వెనుదిరిగాడు. 46 పరుగులతో సర్ఫరాజ్ ఖాన్ ఆకట్టుకున్నాడు.
ప్రారంభంలో రాజస్థాన్ ఆటగాళ్లు..కట్టుదిట్టంగా బౌలింగ్ చేశారు. వారి జోరుతో.. పంజాబ్ జట్టు మొదటి పది ఓవర్లలో 68 పరుగులు మాత్రమే చేసింది. తర్వాత గేల్, సర్ఫరాజ్ జోరుతో తదుపరి 5 ఓవర్లలో 57 పరుగులు వచ్చాయి. జోఫ్రా ఆర్చర్ అద్భుతమైన బౌలింగ్తో ఆకట్టుకున్నాడు. నాలుగు ఓవర్లలో కేవలం 17 పరుగులే ఇచ్చి మెప్పించాడు.
రాజస్థాన్ బౌలర్లలో స్టోక్స్కి రెండు వికెట్లు దక్కగా.. కులకర్ణి, గౌతమ్ తలో వికెట్ తమ ఖాతాలో వేసుకున్నారు.
ఐపీఎల్లో గేల్ మరో ఘనత సాధించాడు. 112 ఇన్నింగ్స్ల్లోనే 4వేల పరుగులు సాధించాడు. అతి తక్కువ ఇన్నింగ్స్ల్లో ఈ ఘనత సాధించిన విదేశీ ఆటగాడిగా రికార్డులకెక్కాడు.
