న్యూజిలాండ్ సారథి, టెస్టు నెంబర్వన్ బ్యాట్స్మన్ కేన్ విలియమ్సన్ బ్యాటింగ్ జోరు కొనసాగుతోంది. గతేడాదిని శతకంతో ముగించిన ఈ స్టార్ బ్యాట్స్మన్ ప్రస్తుతం పాకిస్థాన్తో జరుగుతోన్న రెండో టెస్టులో అద్భుత డబుల్ సెంచరీ చేశాడు. ఫలితంగా పలు రికార్డులను కైవసం చేసుకున్నాడు.
పాక్తో జరుగుతోన్న రెండో టెస్టు మ్యాచ్ మూడో రోజు ఈ ఘనతను సాధించాడు విలియమ్సన్. హెన్రీ నికోలస్తో కలిసి నాలుగో వికెట్కు 369 పరుగుల భారీ భాగస్వామ్యాన్ని నెలకొల్పాడు. 157 పరుగులు చేసిన నికోలస్ మహ్మద్ అబ్బాస్ బౌలింగ్లో వెనుదిరిగాడు. తర్వాత కూడా అదే జోరును కొనసాగించిన విలియమ్సన్ టెస్టుల్లో నాలుగో డబుల్ సెంచరీ సాధించాడు. అలాగే కివీస్ తరఫున 7000 టెస్టు పరుగులు పూర్తి చేసుకున్న మూడో ఆటగాడిగా నిలిచాడు. పలు రికార్డులూ సాధించాడు.
- కనీసం వేయి పరుగులు సాధించిన బ్యాట్స్మెన్ పరంగా చూసుకుంటే గత మూడేళ్ల నుంచి విలియమ్సన్ టెస్టుల్లో అత్యధిక సగటు (65.74)తో బ్యాటింగ్ చేస్తున్నాడు. బాబర్ అజామ్ (62.80), లబుషేన్ (58.81), నికోలస్ (53.53), స్టీవ్ స్మిత్ (52.62), కోహ్లీ (52.56) కూడా కేన్ తర్వాతే ఉన్నారు.
- న్యూజిలాండ్ తరఫున వరుసగా మూడు టెస్టుల్లో సెంచరీ చేసిన నాలుగో ఆటగాడు కేన్. మార్క్ బుర్గెస్, రాస్ టేలర్, టామ్ లాథమ్ ఇతడి కంటే ముందున్నారు.
- 2016 నుంచి 10కి పైగా టెస్టు సెంచరీలు చేసిన రెండో కెప్టెన్ విలియమ్సన్. ఇతడు 11 సెంచరీలతో ఉండగా, కోహ్లీ 16 శతకాలతో ముందున్నాడు.
- నాలుగో వికెట్కు కేన్, నికోలస్ నెలకొల్పిన 369 పరుగులు భాగస్వామ్యం న్యూజిలాండ్కు అత్యుత్తమం. ఇంతకుముందు రాస్ టేలర్, జెస్సీ రైడర్ 271 పరుగులు జోడించారు.
- విలియమ్సన్కు ఇది నాలుగో డబుల్ సెంచరీ. కివీస్ తరఫున అత్యధికంగా నాలుగు ద్విశతకాలు చేసిన మెక్కలమ్ను సమం చేశాడు. టేలర్, స్టీపెన్ ఫ్లెమింగ్ మూడు డబుల్ సెంచరీలు చేశారు.
