క్రికెట్లో జాతివివక్షపై క్రికెటర్లు డారెన్ సామీ, క్రిస్ గేల్, బ్రావో తర్వాత మరో వెస్టిండీస్ ప్లేయర్ జాసన్ హోల్డర్ తన గళాన్ని విప్పాడు. మ్యాచ్ ఫిక్సింగ్, డోపింగ్లతో సమానంగా జాతివివక్షనూ పరిగణించాలని విజ్ఞప్తి చేశాడు.
"డోపింగ్ లేదా క్రికెట్లో అవినీతికి విధించే జరిమానాతో సమానంగా జాత్యాహంకారానికి శిక్షలు ఉండాలి. సిరీస్ ప్రారంభమయ్యే ముందు యాంటీ డోపింగ్, అవినీతి నిరోధక అంశంతో పాటు జాత్యాహంకారంపై ఆటగాళ్లందరికీ అర్థమయ్యేలా చెప్పాలి . ఆ సందేశంతో దానిపై మరింత అవగాహన రావాలి. క్రికెట్లో నాకు ఇప్పటి వరకు ఎలాంటి జాతివివక్ష ఎదురవ్వలేదు. కానీ, మన చుట్టూ ఉన్న ఆటగాళ్లు దీని గురించి ప్రస్తావిస్తున్నారు. కాబట్టి ఇలాంటి విషయాలపై కచ్చితంగా చర్చ అవసరం."
- జాసన్ హోల్డర్, వెస్టిండీస్ క్రికెటర్
జులై 8 నుంచి ఇంగ్లాండ్, వెస్టిండీస్ మధ్య ప్రారంభంకానున్న టెస్టు సిరీస్లో జాతివివక్షకు వ్యతిరేకంగా ఇరుజట్లు నిరసన చేపట్టనున్నాయి.
అంతర్జాతీయ క్రికెట్ మండలి (ఐసీసీ) నియమావళి ప్రకారం ఏ ఆటగాడైనా మూడుసార్లు జాతివివక్షకు పాల్పడితే సదరు క్రికెటర్ను జీవితకాలం నిషేధిస్తారు. తొలిసారి ఈ చర్యకు పాల్పడితే ఆటగాడిపై నాలుగు టెస్టులు లేదా ఎనిమిది పరిమిత ఓవర్ల మ్యాచ్ల్లో వేటు వేస్తారు.
గతేడాది దక్షిణాఫ్రికా ఆల్రౌండర్ ఫెహ్లుక్వాయోను లక్ష్యంగా చేసుకుని జాతి వివక్ష వ్యాఖ్యలు చేసినందుకు పాకిస్థాన్ కెప్టెన్ సర్ఫరాజ్ అహ్మద్పై నాలుగు మ్యాచ్ల నిషేధం విధించారు.
