రెండు రోజుల్లో ఐపీఎల్ 12వ సీజన్ మొదలవనుంది. ఒకవైపు వేసని తాపానికి రోజంతా డీలా పడిన సమయంలో పొట్టి క్రికెట్తో కాస్తంత ఊరట లభించనుంది. రోహిత్ మెరుపులు, కోహ్లీ అరుపులు, ధోని వ్యూహాలతో మైదానాలు సందడిగా మారనున్నాయి. ఇప్పటివరకు జరిగిన ప్రీమియర్ లీగ్లన్నింటిలో అత్యధిక పరుగులు సాధించిన బ్యాట్స్మన్లపై ఓ సారి లుక్కేద్దాం.
సురేష్ రైనా
ఒకప్పుడు టీమిండియా మిడిల్ ఆర్డర్లో ధనాధన్ బ్యాటింగ్తో అదరగొట్టాడు రైనా. ప్రస్తుతం ఫామ్ కోల్పోయాడు. తిరిగి తుది జట్టులో స్థానం కోసం ఆశగా ఎదురుచూస్తున్నాడు. ప్రతి ఐపీఎల్లోనూ అద్భుత ప్రదర్శన చేసే ఈ లెఫ్ట్ హ్యాండ్ బ్యాట్స్మెన్ మొత్తం ఐపీఎల్లో అత్యధిక పరుగులు సాధించిన ఆటగాళ్లలో మొదటి స్థానంలో ఉన్నాడు. 176 మ్యాచ్లు ఆడి 172 ఇన్నింగ్స్ల్లో 34.37 సగటుతో 4,985 పరుగులు చేశాడు. ఐదు వేల పరుగులు సాధించిన మొదటి క్రికెటర్గా నిలవడానికి ఇంకా 15 పరుగుల దూరంలో ఉన్నాడీ చెన్నై సూపర్ కింగ్స్ ఆటగాడు.
విరాట్ కోహ్లీ
రాయల్ ఛాలెంజర్స్ బెంగళూరు జట్టుకు సారథ్యం వహిస్తోన్న కోహ్లీ.. జట్టుకు కప్పు తీసుకురావడంలో మాత్రం విఫలమవుతున్నాడు. బ్యాట్స్మెన్గా అద్భుత ప్రదర్శన కనబరుస్తున్నా ఛాలెంజర్స్ను విజయతీరాలకు చేర్చలేకపోతున్నాడు. ఐపీఎల్లో అత్యధిక పరుగులు సాధించిన ఆటగాళ్ల జాబితాలో రెండో స్థానంలో ఉన్న కోహ్లీ మొదటి స్థానంలో ఉన్న రైనాకు గట్టి పోటీ ఇస్తున్నాడు. ఇప్పటివరకు 163 మ్యాచ్లు ఆడి 155 ఇన్నింగ్స్ల్లో 38.35 సగటుతో 4,948 పరుగులు సాధించాడు విరాట్.
రోహిత్ శర్మ
ముంబయి ఇండియన్స్కు సారథ్యం వహిస్తోన్న రోహిత్ ఐపీఎల్లో జట్టును విజయ పథాన నడిపించాడు. వన్డేల్లో మూడు డబుల్ సెంచరీలు సాధించిన ఏకైక క్రికెటర్గా రికార్డు సృష్టించిన హిట్మ్యాన్ పొట్టి ఫార్మాట్లోనూ తనదైన హిట్టింగ్తో ఆకట్టుకోగల సమర్థుడు. మొత్తం 173 మ్యచ్లు ఆడి 168 ఇన్నింగ్స్ల్లో 4,493 పరుగులు సాధించి మూడో స్థానంలో ఉన్నాడు.
గౌతం గంభీర్
2011 భారత ప్రపంచకప్ గెలుపులో కీలకపాత్ర పోషించిన గంభీర్ అనంతరం జట్టులో స్థానం సంపాదించ లేకపోయాడు. గత కొన్నేళ్లుగా దేశవాళీ, ఐపీఎల్లో మాత్రమే ఆడుతోన్న ఈ లెఫ్ట్ హ్యాండ్ బ్యాట్స్మెన్ కోల్కతాకు రెండు సార్లు ట్రోఫీ అందించాడు. ఐపీఎల్లో 154 మ్యాచ్ల్లో 152 ఇన్నింగ్స్ల్లో 4,217 పరుగులు సాధించాడు.
రాబిన్ ఊతప్ప
టీమిండియాలో చోటు కోల్పోయినా ఐపీఎల్లో మాత్రం అదరగొడుతుంటాడు ఊతప్ప. కోల్కతా రెండు సార్లు ట్రోఫీ సాధించడంలో కీలక పాత్ర పోషించాడు. మొత్తం ఇప్పటివరకు 165 మ్యాచ్లు ఆడిన ఊతప్ప 158 ఇన్నింగ్స్ల్లో 4,086 పరుగులు సాధించి ఐదో స్థానంలో ఉన్నాడు.
5000 పరుగుల క్లబ్బులో...
ఐపీఎల్లో ఐదు వేల పరుగులు సాధించిన ఆటగాడిగా నిలవడానికి ఇంకా 15 పరుగుల దూరంలో ఉన్నాడు సురేష్ రైనా. కోహ్లీ కూడా 4,948 పరుగులతో ఈ క్లబ్బులో చేరేందుకు ఎదురుచూస్తున్నాడు. మరో బ్యాట్స్మెన్ రోహిత్ కూడా ఈ సీజన్లో ఐదు వేల పరుగులు సాధించడానికి అవకాశం ఉంది.
