చెన్నై వేదికగా జరిగిన ఐపీఎల్ వేలంలో అనూహ్యంగా అధిక ధరకు అమ్ముడై రికార్డు సృష్టించారు భారత యువ క్రికెటర్లు షారుక్ ఖాన్, చేతన్ సకరియా. రూ.20 లక్షల కనీస విలువ జాబితాలో ఉండి.. కోట్ల రూపాయలను తమ ఖాతాలో వేసుకున్నారు. వీరి ప్రస్థానమేంటో తెలుసుకుందామా మరి.
షారుక్ ఖాన్:
ఈ పేరు వినగానే బాలీవుడ్ హీరో షారుక్ ఖాన్ గుర్తొస్తాడు. కానీ గత కొంత కాలంగా క్రికెట్లోనూ ఈ పేరు సుపరిచితమైంది. తమిళనాడుకు చెందిన ఈ యంగ్ క్రికెటర్.. బ్యాట్తోను, బంతితోనూ రాణించగల సమర్థుడు. 2014లో అండర్-19 వరల్డ్ కప్లో స్థానం కోల్పోయిన షారుక్.. తనను తాను మరింత సాన పెట్టుకున్నాడు.
తమిళనాడు ప్రీమియర్ లీగ్లో తానెంటో నిరూపించుకున్న ఈ యువ కెరటం.. ఇటీవల జరిగిన సయ్యద్ ముస్తాక్ అలీ టోర్నీ క్వార్టర్ ఫైనల్లో 40 పరుగులు చేసి జట్టును ఫైనల్ చేర్చడంలో కీలక పాత్ర పోషించాడు. ఫైనల్లోనూ బాగానే ఆడాడు.
టీ20లకు అవసరమైన బ్యాటింగ్ వేగం, కండబలం అతడి సొంతం. గతంలో ఆఫ్ స్పిన్ వేసేవాడు. ప్రస్తుతం ఫాస్ట్ బౌలింగ్పై దృష్టిసారించాడు. కఠిన పరిస్థితుల్లో మ్యాచులను ముగించడం అతడి శైలి.
తాజాగా జరిగిన ఐపీఎల్ వేలంలో పంజాబ్ ఫ్రాంచైజీ రూ.5.25 కోట్లకు షారుక్ను సొంతం చేసుకుంది. నికోలస్‌ పూరన్‌తో కలిసి షారుక్ మ్యాచ్‌ విన్నర్‌గా మారగలడని అతడిని కొనుగోలు చేసింది. గతేడాది ఐపీఎల్లో ఇతడిపై ఏ ఫ్రాంఛైజీ ఆసక్తి చూపలేదు.
చేతన్ సకరియా:
గుజరాత్లోని భావ్నగర్కు సమీపంలో ఉన్న ఓ గ్రామం నుంచి వచ్చాడు చేతన్ సకరియా. దేశవాళీలో సౌరాష్ట్రకు ప్రాతినిధ్యం వహిస్తున్నాడు ఈ యువ కెరటం. బ్యాటింగ్తో పాటు బౌలింగ్ చేయగల సత్తా చేతన్ సొంతం. అతని కోచ్ రాజేంద్ర గోయల్ సూచన మేరకు బౌలింగ్లోనూ రాణిస్తున్నాడు.
జహీర్ ఖాన్ మొదలు ప్రస్తుత ఆసీస్ పేసర్ మిచెల్ స్టార్క్ బౌలింగ్ చూస్తూ ప్రేరణ పొందాడు చేతన్. ఇటీవల జరిగిన ముస్తాక్ అలీ టోర్నీలో అత్యధిక పరుగులు చేసిన ఆటగాళ్ల జాబితాలో ఆరో స్థానంలో ఉన్నాడు ఈ యువ క్రికెటర్. తాజా వేలంలో రాజస్థాన్ రాయల్స్ రూ.1.2 కోట్లకు దక్కించుకుంది.
ఇదీ చదవండి: ఐపీఎల్ వేలం: భారీ ధర పలికిన కైల్ జేమిసన్
