ఇండియన్ ప్రీమియర్ లీగ్(ఐపీఎల్) 13వ ఎడిషన్కు కౌంట్డౌన్ ప్రారంభమైంది. ఇప్పటికే ఫ్రాంచైజీలన్నీ ఈ ఏడాది ట్రోఫీని కైవసం చేసుకోవాలనే లక్ష్యంతో కసరత్తులు చేస్తున్నాయి. కొంత మంది ఆటగాళ్లు ప్రాక్టీసు కూడా మొదలుపెట్టారు. అయితే ఈ లీగ్లో టాపార్డర్ బ్యాట్స్మెన్పై పెట్టే పెట్టుబడి అంతా ఇంతా కాదు. ఎందుకంటే అత్యధిక పరుగులతో జట్టును గెలుపు దిశగా నడిపించేది వీళ్లే. ఐపీఎల్ ప్రారంభమైనప్పటి నుంచి ట్రోఫీని దక్కించుకున్న జట్లలో టాపార్డర్ ఆటగాళ్లు కీలక పాత్ర పోషించారు. ఈ ఏడాది కూడా మొదటి ముగ్గురు బ్యాట్స్మెన్ పనితీరుపై ఫ్రాంచైజీల అదృష్టం ఆధారపడి ఉంది. ఈ క్రమంలోనే ఐపీఎల్లో ఉత్తమైన టాపార్డర్ను కలిగి ఉన్న జట్ల గురించి తెలుసుకుందాం.
దిల్లీ క్యాపిటల్స్
టాపార్డర్ బ్యాట్స్మెన్: శిఖర్ ధావన్, పృథ్వీ షా, అజింక్య రహానె, జాసన్ రాయ్, శ్రేయస్ అయ్యర్
గత సీజన్లో దిల్లీ క్యాపిటల్స్ రెండో క్వాలిఫయర్ వరకు చేరుకోగలిగింది. ఈ లీగ్లో శిఖర్ ధావన్ అద్భుత ప్రదర్శన కనబరిచాడు. 135.67 స్ట్రైక్ రేట్తో 16 మ్యాచ్ల్లో 521 పరుగులు సాధించాడు. శ్రేయస్ అయ్యర్ కూడా 463 పరుగులు సాధించి ప్రత్యేక గుర్తింపు తెచ్చుకున్నాడు. అజింక్యా రహానె, జాసన్ రాయ్ కూడా సత్తాచాటారు. గతేడాది రాజస్థాన్ రాయల్స్ తరఫున ఆడిన రహానె.. 13 మ్యాచ్ల్లో 393 పరుగులు చేశాడు. ఇక విధ్వంసకర బ్యాట్స్మన్ రాయ్ గురించి ప్రత్యేకంగా చెప్పనక్కర్లేదు.
ముంబయి ఇండియన్స్
టాపార్డర్ బ్యాట్స్మెన్: రోహిత్ శర్మ, క్వింటన్ డికాక్, క్రిస్ లిన్, సూర్య కుమార్ యాదవ్, ఇషాన్ కిషన్
గత ఎడిషన్లో ముంబయి ఇండియన్స్ టైటిల్ గెలుపునకు ప్రధాన కారణాల్లో ఒకటి.. జట్టు టాపార్డర్ దృఢంగా ఉండటమే. ఆడిన 16 మ్యాచ్ల్లో క్వింటన్ డికాక్ 529 పరుగులు చేశాడు. టీమ్ఇండియా పరిమిత ఓవర్ల వైస్ కెప్టెన్ రోహిత్ శర్మ 15 మ్యాచ్ల్లో 405 పరుగులు చేసి.. అద్భుతమైన కెప్టెన్సీ నైపుణ్యంతో జట్టును విజయంవైపు నడిపించాడు. టీమ్ కోసం పూర్తి నిబద్ధతతో మైదానంలో నిలబడే యువ ఆటగాళ్లలో సూర్య కుమార్ యాదవ్ ముందుంటాడు. గత సీజన్లో 16 మ్యాచ్ల్లో 524 పరుగులు చేసి.. ఈసారి మళ్లీ చెలరేగేందుకు సిద్ధమవుతున్నాడు. ఇక క్రిస్ లిన్, ఇషాన్ కిషన్లూ జట్టులో కీలక పాత్ర పోషించనున్నారు.
కింగ్స్ ఎలెవెన్ పంజాబ్
టాపార్డర్ బ్యాట్స్మెన్: క్రిస్ గేల్, కేఎల్ రాహుల్, మయాంక్ అగర్వాల్, నికోలస్ పూరన్, కరుణ్ నాయర్
2019 ఐపీఎల్ ట్రోఫీని దక్కించుకోవడానికి కింగ్స్ ఎలెవెన్ పంజాబ్ ఎంతగానో తపించింది. మంచి ఆరంభం లభించినప్పటికీ.. చివరకు ఆరో స్థానంతో సరిపెట్టుకోవాల్సి వచ్చింది. అయితే, కప్ను కైవసం చేసుకునేందుకు జట్టులో అద్భుతమైన టాపార్డర్ బ్యాట్స్మెన్ ఈ జట్టులో ఉన్నారు.
విధ్వంసకర బ్యాట్స్మన్ క్రిస్గేల్ మైదానంలో అడుగుపెడితే చాలు..మ్యాచ్పై అభిమానుల అంచనాలు పెరిగిపోతాయి. నిరుడు జరిగిన ఐపీఎల్లో 13 మ్యాచ్ల్లో 493 పరుగులు చేసి అందరి దృష్టిని ఆకర్షించాడు. 14 ఇన్నింగ్స్ల్లో 593 పరుగులు సాధించిన కేఎల్ రాహుల్.. జట్టులో అత్యధిక స్కోరు చేసిన ఆటగాడిగా నిలిచాడు. ఈసారి జట్టుకు కెప్టెన్గానూ బాధ్యతలు నిర్వర్తించనున్నాడు. మయాంక్ అగర్వాల్ గత సీజన్లో 13 మ్యాచ్ల్లో 332 పరుగులు చేసి తనపై పెట్టుకున్న నమ్మకాన్ని నిలబెట్టుకున్నాడు. నికోలస్ పూరన్, కరుణ్ నాయర్లు టాపార్డర్లో కనిపించడం చాలా అరుదు. అయితే, సాధారణ ఆటగాళ్లకు గాయమైనప్పుడు వారి స్థానంలో బరిలోకి దిగుతారు.
