యూఏఈ వేదికగా సెప్టెంబరు 19 నుంచి ఇండియన్ ప్రీమియర్ లీగ్ (ఐపీఎల్) ఆరంభం కానుంది. ఇందులో పాల్గొనేందుకు దక్షిణాఫ్రికా క్రికెటర్లు ఆసక్తి చూపుతున్నారు. కానీ కరోనా వ్యాప్తి వల్ల ఆ దేశంలో విధించిన విమాన ప్రయాణ ఆంక్షలు కఠినతరం చేశారు. దీంతో వారిని ప్రత్యేక విమానంలో యూఏఈకి తీసుకొచ్చేందుకు ఫ్రాంఛైజీలు సన్నాహాలు చేస్తున్నాయి.
దక్షిణాఫ్రికాకు చెందిన ఏబీ డివిలియర్స్ (రాయల్ ఛాలెంజర్స్ బెంగళూరు), కగిసో రబాడా (దిల్లీ క్యాపిటల్స్), డుప్లెసిస్ (చెన్నై సూపర్కింగ్స్), క్వింటన్ డికాక్ (ముంబయి ఇండియన్స్) లాంటి క్రికెటర్లు పాల్గొనున్నారు.
ఆదివారం (ఆగస్టు 2) జరిగే ఐపీఎల్ పాలకమండలి సమావేశం తర్వాత సఫారీ ఆటగాళ్లను ఏ విధంగా యూఏఈ తీసుకురావాలనే దానిపై స్పష్టత వస్తుందని ఓ ఫ్రాంఛైజీ అధికారి వెల్లడించారు.
ఆదివారం రానున్న స్పష్టత!
"దక్షిణాఫ్రికా క్రికెటర్లు.. ప్రయాణ ఆంక్షలు కారణంగా ఐపీఎల్కు రాలేకపోతున్నారు. ఈ సమస్య ఒక్క ఫ్రాంఛైజీకి మాత్రమే సంబంధించినది కాదు. దాదాపు అన్ని జట్లలో ఈ దేశ ఆటగాళ్లు ఉన్నారు. వారందరి కోసం ఓ చార్టెడ్ విమానాన్ని సిద్ధం చేసి, ఆ ఖర్చును యాజమాన్యాలు షేర్ చేసుకుంటాయి. ఆదివారం జరిగే భేటీ తర్వాతే ఎలాంటి నిర్ణయాన్నైనా తీసుకుంటాం" అని ఆ అధికారి చెప్పారు.
ఆ హోటళ్లలోనే ఉంటాం
అబుదాబి, దుబాయ్లో ఆటగాళ్లను ఉంచాలని ఫ్రాంఛైజీలు భావిస్తున్నాయి. ఈ క్రమంలోనే ఆ దేశాలకు ముందు ఓ బృందాన్ని పంపించాలని బీసీసీఐ అనుకుంటోంది. "షార్జాలో ఉండేందుకు ఎవరూ ఆసక్తి చూపడం లేదు. మీకు అబుదాబి, దుబాయ్లలో 15 అంతర్జాతీయ హోటళ్లలు ఉన్నాయి. మేం అక్కడే ఉండాలని చూస్తున్నాం. బీసీసీఐ ముందుగా ఓ జట్టును పంపాలని యోచిస్తున్నట్లు మాకు తెలిసింది. ప్రస్తుత పరిస్థితుల్లో వాణిజ్య విమానాలు లేనందున.. ఆటగాళ్ల కోసం ప్రత్యేకమైన చార్టడ్ విమానాలు నడపాల్సి ఉంటుంది" అని ఓ ఫ్రాంచైజీ అధికారి తెలియజేశారు.
