సెప్టెంబరు 19 నుంచి ఐపీఎల్ మొదలుకానుంది. ఈ క్రమంలో సీఎస్కే యాజమాన్యం.. తమ జట్టులోని భారత క్రికెటర్ల కోసం చెన్నైలో ఆగస్టు 15-20 మధ్య శిక్షణా శిబిరం ఏర్పాటు చేసింది. ఇందులో ధోనీ, హర్భజన్ సింగ్, రైనా, అంబటి రాయుడు తదితరులు పాల్గొనుండగా.. జడేజా మాత్రం రాలేకపోతున్నట్లు వెల్లడించాడు. ఆగస్టు 21న దుబాయ్ వెళ్లే సమయానికి వస్తానని అతడు చెప్పినట్లు ఫ్రాంఛైజీ తెలిపింది.
ఈ క్యాంప్కు క్రికెటర్లతో పాటు బౌలింగ్ కోచ్ లక్ష్మీపతి బాలాజీ మాత్రమే హాజరు కానున్నాడు. బ్యాటింగ్ కోచ్ స్టీఫెన్ ఫ్లెమింగ్, సహాయ కోచ్ మైకేల్ హస్సీ, సీఈఓ కాశీ విశ్వనాథన్.. జట్టు దుబాయ్ వెళ్లిన తర్వాత కలుస్తారు.
వీరితో పాటు దక్షిణాఫ్రికా క్రికెటర్లు డుప్లెసిస్, లుంగి ఎంగిడి, ఇమ్రాన్ తాహిర్.. సెప్టెంబరు 1 తర్వాత దుబాయ్ వస్తామని చెప్పినట్లు విశ్వనాథ్ వెల్లడించారు.
యూఏఈ వేదికగా షార్జా, అబుదాబీ, దుబాయ్లోని స్టేడియాల్లో ఈ ఏడాది ఐపీఎల్ మ్యాచ్లు జరగనున్నాయి. కరోనా ప్రభావం కారణంగా మైదానంలోకి ప్రేక్షకుల్ని ఎవరినీ అనుమతించరు.
