ఐసీసీ ప్రధాన టోర్నీల్లో భారత జట్టుకు ప్రత్యామ్నాయ ప్రణాళిక లేదని ఇంగ్లాండ్ మాజీ కెప్టెన్ నాసర్ హుస్సేన్ అభిప్రాయపడ్డాడు. టాపార్డర్ విఫలమైతే మిడిలార్డర్లో సత్తా చాటే ఆటగాళ్లు కనిపించడం లేదని అన్నాడు.
ఐసీసీ టీ20 ప్రపంచకప్ 2014 (యువరాజ్ సింగ్ దూరమయ్యాడు), 2017 ఛాంపియన్స్ట్రోఫీ, 2019 ప్రపంచకప్లలో టాపార్డర్ పతనంతో జట్టు విఫలమైంది. ఎందుకంటే జట్టుకు బ్యాటింగ్ లైనప్ చాలా ముఖ్యమైనది. ఇదే విషయంపై తాజాగా స్పందించాడు నాసర్ హుస్సేన్.
"ఐసీసీ ప్రధాన టోర్నీల కోసం జరుగుతున్న భారత జట్టు ఎంపికలో ఏదో తప్పు దొర్లుతుంది. పరిస్థితులకు అనుగుణంగా జట్టు కూర్పు చేయడంలో విఫలమవుతున్నారు. ఇది కేవలం ఒక గేమ్ ప్లాన్ గురించి మాత్రమే కాదు. 2019 ప్రపంచకప్లో న్యూజిలాండ్తో జరిగిన సెమీస్లో కోహ్లీ, రోహిత్ శర్మ ఔటైన తర్వాత మిడిలార్డర్ విఫలమవ్వడం టీమ్ఇండియాకు పెద్ద ఎదురుదెబ్బ. ప్లాన్ 'ఏ' కలిగి ఉండటమే కాకుండా టాపార్డర్ విఫలమైన తరుణంలో ప్లాన్ 'బీ'ని అమలు చేయడానికి ముందుగానే సంసిద్ధం అవ్వాలి".
- నాసర్ హుస్సేన్, ఇంగ్లాండ్ మాజీ కెప్టెన్
టీమ్ఇండియా మాజీ కెప్టెన్ మహేంద్రసింగ్ ధోనీతో పోల్చుకుంటే కోహ్లీ ప్రతిభావంతుడైనా.. మహీకి ప్రత్యామ్నాయం కాలేకపోయాడని అభిప్రాయపడ్డాడు నాసర్ హుస్సేన్. కొన్ని విషయాల్లో కోహ్లీ మెరుగవ్వాలని తెలిపాడు.
టీమ్ఇండియా ఎన్నో విషయాల్లో గొప్పగా ఉన్నప్పటికీ.. జట్టు ఎంపిక అంశంలో తప్పు చేస్తుందని భావించడం లేదని వెల్లడించాడు నాసర్. జట్టులో నాలుగో స్థానంపై నిలకడ కలిగిన క్రికెటర్ లేకపోవడంపై విచారాన్ని వ్యక్తం చేశాడు. ఈ అంశం జట్టు విజయాలను ప్రభావితం చేస్తుందని అన్నాడు హుస్సేన్.
