ఈ ఏడాది చివర్లో ఆస్ట్రేలియా పర్యటనకు టీమ్ఇండియా సన్నాహాలు ప్రారంభించింది. కరోనా కారణంగా ఏర్పడిన సుదీర్ఘ విరామం అనంతరం ఇప్పుడిప్పుడే క్రికెట్ పునఃప్రారంభమవుతున్న వేళ.. ఈ సిరీస్కు ప్రాధాన్యత సంతరించుకుంది. ఇరు జట్ల మధ్య జరిగే టోర్నీ కోసం అభిమానులు, బోర్డులు, ప్రసార కర్తలు ఆసక్తిగా ఎదురు చూస్తున్నారు. ఇందుకు కారణాలూ లేకపోలేదు. అంతర్జాతీయ క్రికెట్లో రెండు ఉత్తమ జట్లు తలపడనుండగా.. కరోనా అనంతరం ప్రపంచంలో అత్యధిక ప్రాధాన్యం సంతరించుకున్న క్రికెట్ సిరీస్ ఇదే కావడం విశేషం. ఆర్థిక పరంగా ఆస్ట్రేలియా క్రికెట్కూ ఎంతో కీలకమైన సిరీస్ ఇది. ఈ క్రమంలోనే అంతర్దాతీయ క్రికెట్కు భారత్- ఆస్ట్రేలియా మధ్య జరిగే సిరీస్ను కీలకంగా ఎందుకు భావిస్తున్నారనే విషయంపై ఆసీస్ మాజీ క్రికెటర్ బ్రెట్ లీ వివరించాడు.
"ఈ పర్యటన చాలా ముఖ్యమైంది. ఎప్పుడైనా భారత్, -ఆస్ట్రేలియా పర్యటనకు వచ్చినా. లేదా మేము అక్కడికి వెళ్లనా. ఇది యాషెస్తో సమానంగా ఉంటుంది. ఈ సిరీస్ ఎప్పటికీ కీలకమైందే. ఆస్ట్రేలియా టెస్టు సిరీస్లో భారత్తో ఆడుతున్నప్పుడు.. కచ్చితంగా ఉత్తమమైన పోటీ తత్వాన్ని కలిగి ఉంటుందని నమ్ముతున్నా. ఇరు దేశాలు క్రికెట్ను ఎంతగానో ఆరాధిస్తాయి".
-బ్రెట్ లీ, ఆస్ట్రేలియా మాజీ క్రికెటర్
ఆస్ట్రేలియా పర్యటన భారత అభిమానులకే కాక... క్రికెటర్లు, ఆస్ట్రేలియా బోర్డుకూ ఎంతో కీలకమైనదని బ్రెట్ లీ పునరుద్గాటించాడు. మరోవైపు ఈ ఏడాది అక్టోబరులో ఆస్ట్రేలియా వేదికగా జరగాల్సిన టీ20 ప్రపంచకప్ నిర్వహణపై కరోనా వల్ల అనిశ్చితి నెలకొంది. ఈ విషయంపై స్పందించిన బ్రెట్లీ.. మెగా టోర్నమెంట్ను ఐసీసీ వాయిదా వేస్తుందని భావిస్తున్నట్లు తెలిపాడు.
2018-19లో భారత్ ఆస్ట్రేలియా పర్యటనలో భాగంగా విరాట్ కోహ్లీ సారథ్యంలోని జట్టు ఆసీస్ను 2-1 తేడాతో ఓడించి ట్రోఫీని కైవసం చేసుకుంది. కంగారూ గడ్డపై విజయం సాధించిన తొలి భారత జట్టుగా రికార్డు సృష్టించింది.
