ఆస్ట్రేలియాతో జరిగిన చివరి వన్డేలో టీమ్ఇండియా గెలుపొందినా.. సిరీస్ను చేజార్చుకుంది. ఈ విజయంతో.. ఐసీసీ పురుషుల క్రికెట్ వరల్డ్ కప్ సూపర్ లీగ్ పాయింట్ల ఖాతా తెరిచింది. కానీ, మొదటి వన్డేలో స్లో ఓవర్ రేటు కారణంగా భారత్కు రావాల్సిన 10 పాయింట్లలో ఒకదాన్ని కోల్పోయి 9 పాయింట్లను దక్కించుకుంది.
ఈ సూపర్ లీగ్ పాయింట్ల పట్టికలో ఆస్ట్రేలియా 40 పాయింట్లతో టాప్లో నిలిచింది. 2-1 తేడాతో భారత్ను ఓడించిన తర్వాత ఆసీస్ తొలిస్థానానికి ఎగబాకింది. అంతకుముందు ఇంగ్లాండ్ను 2-1తో ఓడించింది.
ఈ సిరీస్లో మొదటి వన్డే తర్వాత స్లో ఓవర్ రేటు కారణంగా భారత ఆటగాళ్లందరికీ మ్యాచ్ ఫీజులో 20 శాతం కోత విధించనున్నట్లు ఐసీసీ అప్పుడు ప్రకటించినా.. పాయింట్ల తగ్గింపు విషయాన్ని మాత్రం ప్రస్తావించలేదు.
ఐర్లాండ్పై 2-1తేడాతో గెలిచిన ఇంగ్లాండ్ 30 పాయింట్లతో రెండో స్థానంలో ఉంది. పాకిస్థాన్ 20 పాయింట్లతో తర్వాతి స్థానంలో ఉంది.
వన్డే సూపర్ లీగ్ ఏంటి..?
2023 వన్డే ప్రపంచకప్లో అర్హత కోసం.. ఈ ఏడాది జులై 30 నుంచి ఈ సూపర్ లీగ్ను ప్రారంభించారు. ఇంగ్లాండ్-ఐర్లాండ్ మధ్య తొలి మ్యాచ్ జరిగింది.
ఐసీసీ శాశ్వత సభ్యదేశాలైన 12 జట్లతో పాటు నెదర్లాండ్స్ ఈ సూపర్ లీగ్లో పాల్గొంటాయి. ఈ లీగ్‌లోని 13 జట్లు 8 ప్రత్యర్థి జట్లతో సిరీస్లు(స్వదేశంలో 4, విదేశాల్లో 4) ఆడాల్సి ఉంటుంది. తొలి ఏడు స్థానాల్లో నిలిచిన జట్లు, ఆతిథ్య భారత్ నేరుగా 2023 ప్రపంచకప్‌కు అర్హత సాధిస్తాయి. అడుగున నిలిచిన ఐదు జట్లు ప్రపంచకప్ క్వాలిఫయర్స్‌ ఆడతాయి.
