న్యూజిలాండ్‌తో మరో కీలక సమరానికి టీమిండియా సిద్ధమైంది. నేడు(శనివారం) కివీస్‌తో రెండో వన్డేలో కోహ్లీ సేన తలపడనుంది. మూడు వన్డేల సిరీస్‌లో తొలి మ్యాచ్ ఓడిన భారత్.... ఈ మ్యాచ్లో గెలవాలన్న పట్టుదలతో ఉంది. ఉదయం 7:30 గంటలకు ప్రారంభం కానుందీ మ్యాచ్.
తొలి వన్డేలో జరిగిన బౌలింగ్‌, ఫీల్డింగ్ వైఫల్యాలు పునరావృతం కాకుండా చూడాలని భారత్ భావిస్తోంది. తొలి వన్డేలో భారత్‌ను చిత్తు చేసిన కివీస్‌.. అదే జోరు కొనసాగించాలన్న లక్ష్యంతో బరిలో దిగుతోంది.
బ్యాటింగ్ అదరగొట్టాలి!
ఈ మ్యాచ్లోని బ్యాటింగ్‌లో భారత్కు పెద్దగా సమస్యలు ఎదురయ్యే అవకాశం లేదు. తొలి వన్డేలో పర్వాలేదనించిన పృధ్వీ షా- మయాంక్ అగర్వాల్ ఈరోజూ బ్యాటింగ్ దాడిని ఆరంభించనున్నారు. కోహ్లీ, రాహుల్ సూపర్ ఫామ్‌లో ఉండడం భారత్కు కలిసొచ్చే అంశం. గత మ్యాచ్లో, తన వన్డే కెరీర్లో తొలి సెంచరీ సాధించిన శ్రేయస్ అయ్యర్‌ కూడా ఫామ్‌ను కొనసాగించాలని చూస్తున్నాడు.
కలవరపెడుతున్న ఫీల్డింగ్
కోహ్లీ సేనను బౌలింగ్‌, ఫీల్డింగ్ వైఫల్యాలు ఆందోళన రేపుతున్నాయి. మధ్య ఓవర్లలో వికెట్లు తీయలేకపోవడం.. భారత్కు ప్రతికూల అంశంగా మారుతోంది. తొలి వన్డేలో టీమిండియా.. 24 వైడ్లు సహా మొత్తం 29 అదనపు పరుగులు ఇవ్వడం టీమ్‌ మేనేజ్‌మెంట్‌ను కలవరపరుస్తోంది.
శార్దుల్ బదులు ఠాకుర్?
ఈ మ్యాచ్లో భారత జట్టులో మార్పులు చేసే అవకాశముంది. శార్దూల్‌ ఠాకూర్ స్థానంలో నవదీప్‌ సైనీ తుది జట్టులోకి రావొచ్చు. కేదార్‌ జాదవ్‌కు బదులుగా మనీశ్ పాండేను తీసుకొనే అవకాశాలను మేనేజ్‌మెంట్‌ పరిశీలిస్తోంది.
తొలి వన్డేలో అత్యధిక పరుగులను ఛేదించి చరిత్ర సృష్టించిన కివీస్‌.... రెండో వన్డేలోకి పూర్తి ఆత్మ విశ్వాసంతో బరిలోకి దిగుతోంది. ఈరోజు గెలిచి సిరీస్‌ను కైవసం చేసుకోవాలని పట్టుదలగా ఉంది. తొలి మ్యాచ్‌కు దూరమైన కెప్టెన్‌ విలియమ్సన్‌ ఈ మ్యాచ్లో ఆడడం కూడా సందేహంగా ఉంది. బౌలింగ్‌ వైఫల్యం కివీస్‌ను కూడా కలవరపెడుతోంది. ఈ మ్యాచ్లో వాటిని అధిగమించాలని న్యూజిలాండ్ భావిస్తోంది.
టాస్ కీలకం
ఈ వన్డేలో టాస్ కీలకపాత్ర పోషించనుంది. ఈడెన్‌ పార్క్‌లో రెండోసారి బ్యాటింగ్ చేయడం ప్రయోజనకరంగా ఉండనుంది. తేమ కారణంగా బౌలర్లకు బాల్‌పై పట్టు దొరకడం కష్టంగా మారనుంది. తొలి వన్డేలో ఈ సమస్య వల్లే భారత్ భారీగా అదనపు పరుగులు ఇచ్చింది.
