చెన్నై సూపర్కింగ్స్లో సురేశ్ రైనా లాంటి సత్తా ఉన్న ఆటగాడికి ప్రత్యామ్నాయ ఎంపిక కష్టమని ఆ జట్టు ఓపెనర్ షేన్ వాట్సన్ అన్నాడు. టోర్నీ నుంచి రైనా, హర్భజన్ వైదొలగడం జట్టుకు తీరని లోటు అని, వారిద్దరి స్థానాల్లో మురళీ విజయ్, స్పిన్నర్ పియూష్ చావ్లాలకు అవకాశం ఇస్తే బాగుంటుందని అభిప్రాయపడ్డాడు.
"చెన్నై సూపర్కింగ్స్లో రైనాకు ప్రత్యామ్నాయం వెతకడం కష్టమే. ఐపీఎల్లో అత్యధిక పరుగులు చేసిన వారిలో అతడు రెండోవాడు. టోర్నీలో ఎక్కువ మ్యాచ్లు ఆడిన ఆటగాడిగానూ గుర్తింపు తెచ్చుకున్నాడు. అలాంటి క్రికెటర్, టోర్నీ నుంచి తప్పుకోవడం మా జట్టుకు తీరని లోటు. అతడి స్థానంలో మురళీ విజయ్, హర్భజన్ స్థానంలో చావ్లాకు అవకాశం ఇస్తారని భావిస్తున్నాను. వారిద్దరి అనుభవాన్ని జట్టు కోల్పోయినా.. పరిస్థితులను బట్టి కొత్త వారిని ఉపయోగించుకోవాలి".
- షేన్ వాట్సన్, చెన్నై సూపర్కింగ్స్ ఓపెనర్
ఆగస్టు చివరి వారంలో ఐపీఎల్ కోసం యూఏఈ వెళ్లింది చెన్నై జట్టు. ఆ తర్వాత కొన్నిరోజులకు సీఎస్కే శిబిరంలోని కరోనా కలకలం సృష్టించింది. ఆటగాళ్లు రుతురాజ్ గైక్వాడ్, దీపక్ చాహర్ సహా 11 మంది సిబ్బంది వైరస్ బారిన పడ్డారు. దీంతో మిగతా ఆటగాళ్లతో పాటు సిబ్బందికి పరీక్షలు చేయగా నెగిటివ్గా తేలింది. వైరస్ సోకిన వారు కాకుండా మిగిలిన వారందరూ గత శుక్రవారం ప్రాక్టీస్ ప్రారంభించారు.
బుధవారం చేసిన కొవిడ్ పరీక్షల్లో దీపక్ చాహర్కు కరోనా నెగెటివ్గా తేలింది. మరోసారి చేసే టెస్ట్ల్లో వైరస్ లేదని నిర్ధరణ అయితే జట్టుతో కలిసి ప్రాక్టీసులో చేరొచ్చని జట్టు సీఈఓ వెల్లడించారు.
