మ్యాచ్ ఫిక్సింగ్ కేసులో తనను పోలీసులు అదుపులోకి తీసుకున్న క్షణాలను గుర్తు చేసుకున్నాడు టీమ్ఇండియా బౌలర్ శ్రీశాంత్. అరెస్టు చేసిన తర్వాత తనను ఓ టెర్రరిస్టు వార్డులో ఉంచారని తెలిపాడు. అదే తన జీవితంలో కీలక మలుపని తాజాగా ఓ ఇంటర్వ్యూలో వెల్లడించాడు శ్రీశాంత్.
"నా లైఫ్లోకి ఒకసారి చూసినట్లైతే.. మ్యాచ్ పార్టీ అయిపోయిన కొన్ని క్షణాల్లోనే నన్ను పోలీసులు అదుపులోకి తీసుకున్నారు. విచారణ కోసం నన్ను ఓ టెర్రరిస్టు వార్డులో ఉంచారు. 12 రోజులపాటు రోజుకు 16-17 గంటలపాటు విచారణ సాగింది. ఆ సమయంలో నా కుటుంబసభ్యులు ఎలా ఉన్నారనే ఆలోచన నన్ను కలచివేసింది. కొన్ని రోజుల తర్వాత నా సోదరుడు నన్ను చూడటానికి వచ్చాడు. నా కుటుంబం క్షేమంగా ఉన్నట్లు నాకు అప్పుడే తెలిసింది. ఆ పరిణామాల నుంచి బయటకు రావడానికి కుటుంబ సభ్యులు ఎంతగానో సహకరించారు. మరో విషయం ఏమిటంటే మనం చేసే ప్రతి యుద్ధం గెలవడం ఎంతో ముఖ్యం. ఎవరికి వారు తమ సొంత యుద్ధంలో పాత్రులై ఉంటారు. దిగ్గజ బ్యాట్స్మన్ సచిన్ తెందూల్కర్ ఒక మ్యాచ్లో సెంచరీ చేసినా.. తర్వాతి మ్యాచ్లో డకౌట్ అయిన క్షణాలూ ఉన్నాయి. మీరేదైనా నిర్ణయం తీసుకునే ముందు 10 సెకన్లపాటు ఆలోచించండి. మీరు అనుకున్న దానిపై దృష్టి సారించండి. ప్రపంచం ఏమనుకుంటుందో అనే విషయం మరిచిపోండి."
- శ్రీశాంత్, టీమ్ఇండియా బౌలర్
బాలీవుడ్ హీరో సుశాంత్సింగ్ రాజ్పుత్ మరణంపై టీమ్ఇండియా బౌలర్ శ్రీశాంత్ స్పందిస్తూ.."నేను శిక్షణలో ఉండగా నా భార్య ఓ సందేశాన్ని పంపింది. అ సమయంలో నేను దాన్ని చూడలేదు. తర్వాత కారులో వస్తుండగా.. నా భార్య ఓ వాయిస్ మెయిల్ చేసింది. ఆమె వేళాకోళం చేస్తుందని భావించా. అనంతరం ఆ వార్త నిజమో కాదో అంతర్జాలంలో చెక్ చేశా. సోషల్మీడియాలో సుశాంత్కు సంబంధించిన అనేక ఫొటోలు వైరల్ అయ్యాయి. ఆ రోజు నాకు చాలా బాధగా అనిపించింది" అని తెలిపాడు.
