టీమ్ఇండియా కోచ్కు దరఖాస్తు చేయకపోయినా 2007లో ఆ పదవి ఎలా వరించిందో తాజాగా వెల్లడించాడు మాజీ కోచ్ గ్యారీ కిర్స్టన్. ఇటీవలే ఓ ఆడియో ఆధారిత ఇంటర్వ్యూలో పాల్గొన్న కిర్స్టన్ 2007కు సంబంధించిన కొన్ని సంఘటనలు గుర్తుచేసుకున్నాడు. అప్పటి భారత జట్టు సెలక్షన్ ప్యానెల్లో ఉన్న సునీల్ గావస్కర్ ఆహ్వానంతో తాను ఇంటర్వ్యూకు వెళ్లానని, గ్రెగ్ చాపెల్ కాంట్రాక్టు ముగిశాక తాను కోచ్గా చేరినట్లు వెల్లడించాడు.
"భారత జట్టుకు నన్ను కోచ్గా నియమిస్తానని గావస్కర్ నుంచి మెయిల్ వచ్చింది. అది రూమర్ అని అనుకుని దానికి సమాధానం ఇవ్వలేదు. ఆ తర్వాత..'ఇంటర్వ్యూకు వస్తారా' అనే మరో మెయిల్ వచ్చింది. దాన్ని నా భార్యకు చూపించగా..'అది తప్పుడు వ్యక్తి పనెమో' అని చెప్పింది. కానీ తర్వాత ఇంటర్వ్యూకు వెళ్లా. చాలా విషయాల్లో అదో విచిత్రమైన అనుభవంగా మిగిలిపోయింది. నన్ను అక్కడ చూసిన అనిల్ కుంబ్లే..'ఇక్కడ ఏం చేస్తున్నావు' అని అడిగాడు. భారత జట్టుకు కోచ్ కోసం జరుగుతున్న ఇంటర్వ్యూలో పాల్గొనడానికి వచ్చానని చెప్పా."
-గ్యారీ కిర్స్టన్, టీమ్ఇండియా మాజీ కోచ్
ప్రస్తుత కోచ్ రవిశాస్త్రి.. సెలక్షన్ ప్యానెల్లో ఉన్నాడని తెలిపాడు కిర్స్టన్. ఆ ఇంటర్వ్యూ ఏడు నిమిషాల పాటు చేశారని తెలిపాడు.
"బీసీసీఐ అధికారులతో కలిసి బోర్డు మీటింగ్లో ఉన్నా. పూర్తిగా భయానకమైన వాతావరణంగా అనిపించింది. బోర్డు సెక్రటరీ నాతో మాట్లాడుతూ..'భారత క్రికెట్ భవితవ్యం కోసం మీరు తయారు చేసిన విజన్ ఏంటో తెలియజేయగలరా?' అని ప్రశ్నించాడు. నా దగ్గర దానికి సమాధానం లేదు. ఎందుకంటే ఆ ఇంటర్వ్యూకు ఎలా సంసిద్ధమవ్వాలో ఎవ్వరూ చెప్పలేదు. ఆ తర్వాత అప్పటి కమిటీలో ఉన్న రవిశాస్త్రి మాట్లాడుతూ..'దక్షిణాఫ్రికా జట్టు ఆటగాడిగా భారత జట్టుపై విజయం సాధించడానికి మీరు ఏం చేస్తారు?' అని అడిగాడు. ఆ ప్రశ్న నాకు తేలికగా అనిపించింది. మూడు నిమిషాల పాటు వివరించా. రవిశాస్త్రితో పాటు అందరూ ఆ సమాధానానికి ముగ్ధులయ్యారు. మొత్తం ఏడు నిమిషాల పాటు ఇంటర్వ్యూ జరిగింది. తర్వాత బోర్డు కార్యదర్శి నాకు కాంట్రాక్టు ఇస్తున్నట్లు తెలిపారు."
-కిర్స్టన్, టీమ్ఇండియా మాజీ కోచ్
గ్రెగ్ చాపెల్ తర్వాత కోచ్ పదవికి తాను ఎంపికైనట్లు తెలిపాడు గ్యారీ కిర్స్టన్. టీమ్ఇండియాకు అత్యధిక విజయాలు అందించిన కోచ్గా ఘనత సాధించాడీ మాజీ కోచ్. అతని పర్యవేక్షణలో 2009 టెస్టు ర్యాంకింగ్స్లో భారత జట్టు టాప్లో నిలిచింది భారత్. రెండు సంవత్సరాల తర్వాత ప్రపంచకప్ టైటిల్ను నెగ్గింది.
ఇదీ చూడండి... 'ఉత్తమ ఫ్రాంచైజీ అంటే చెన్నై సూపర్ కింగ్స్'
