బోర్డు నియమాలపై గావస్కర్ వివాదాస్పద వ్యాఖ్యలు!

టీమ్​ఇండియాలో వివిధ వ్యక్తులకు వివిధ నియమాలు ఉంటాయని చెప్పిన గావస్కర్.. అందువల్లే పలువురు ఆటగాళ్లు ఇబ్బందులు పడుతున్నారని అన్నాడు. ఈ విషయంలో కోహ్లీ, అశ్విన్, నటరాజన్​ను పోల్చి వివాదాస్పద వ్యాఖ్యలు చేశాడు.

టీమ్​ఇండియా క్రికెటర్లకు ఒక్కొక్కరికీ ఒక్కోలా నియమాలు ఉంటాయని మాజీ కెప్టెన్ సునీల్ గావస్కర్ అన్నాడు​. ఐపీఎల్​ ప్లేఆఫ్స్​ సమయంలో తండ్రి అయిన నటరాజన్​.. తన కూతురును చూడకుండానే యూఏఈ నుంచి ఆస్ట్రేలియాకు వెళ్లాడని చెప్పాడు. పితృత్వ సెలవులపై రెండో టెస్టు మ్యాచ్​కు ముందు కెప్టెన్​ విరాట్​ కోహ్లీ తన ఇంటికి వెళ్లిన నేపథ్యంలో గావస్కర్ ఈ వ్యాఖ్యలు చేశాడు. తన సూటిదనం వల్ల స్పిన్నర్​​ అశ్విన్ జట్టులో ఇబ్బంది పడుతున్నాడని చెప్పాడు. ఈ మేరకు ఓ పత్రికలో సన్నీ ఆర్టికల్ రాశాడు​.

"అశ్విన్​ చాలా రోజులుగా తన సూటిదనం కారణంగా టీమ్​తో ఇబ్బంది పడుతున్నాడు. అశ్విన్​ ఒకవేళ ఏ మ్యాచ్​లోనైనా వికెట్లు తీయకపోతే తర్వాతి మ్యాచ్​లో అతడ్ని పక్కన పెట్టేస్తారు. బ్యాట్స్​మెన్​కు మాత్రం ఇలా ఉండదు. ఒక మ్యాచ్​లో వాళ్లు పేలవ ప్రదర్శన చేసినా.. తర్వాతి మ్యాచ్​లో అవకాశం ఇస్తారు. ఐపీఎల్​ ప్లే ఆఫ్స్​ అప్పుడు నటరాజన్​ తండ్రి అయ్యాడు. అయినాసరే ఆస్ట్రేలియాతో టీ20 సిరీస్​ కోసం అతను యూఏఈ నుంచి ఆస్ట్రేలియాకు సరాసరి బయల్దేరాడు. టెస్టు సిరీస్​ కోసం నెట్​ బౌలర్​గా కొనసాగుతున్నాడు. కానీ, జట్టులో చోటు మాత్రం ఇవ్వలేదు. జనవరి మూడో వారంతో పూర్తయ్యే టెస్టు సిరీస్​ అనంతరం అతడు తన ఇంటికి వస్తాడు. కానీ, కెప్టెన్​​ కోహ్లీ తన బిడ్డను చూడటం కోసం ముందుగానే బయలుదేరాడు. వివిధ రకాల వ్యక్తులకు వివిధ నియమాలు ఉంటాయి"

-- సునీల్​ గావస్కర్​, టీమ్​ఇండియా మాజీ సారథి

కోహ్లీ భార్య అనుష్క.. జనవరిలో ప్రసవించే ఆవకాశాలు ఉండటం వల్ల రెండో టెస్టుకు ముందు పితృత్వ సెలవులపై స్వదేశానికి వచ్చాడు కోహ్లీ. సారథి బాధ్యతలను సీనియర్​ ఆటగాడు అజింక్యా రహానెకు అప్పగించారు. ఆస్ట్రేలియాతో తొలిటెస్టులో ఘోరంగా ఓడింది టీమ్​ఇండియా.

ఇదీ చూడండి:భారత్-ఆసీస్ మూడో టెస్టుకు ప్రత్యామ్నాయ వేదిక