ఆస్ట్రేలియా పర్యటనకు భారత క్రికెట్‌ జట్ల ఎంపికపై దుమారం రేగుతోంది. సునీల్‌ జోషి సారథ్యంలోని సెలెక్షన్ కమిటీపై మాజీలు విమర్శలు గుప్పిస్తున్నారు. ఆటగాళ్ల ఎంపికకు పాటించిన ప్రమాణాలపై ఒకరు.. ఐపీఎల్‌ ప్రదర్శనను టెస్టులకు ఎలా పరిగణిస్తారని మరొకరు..ప్రతిభావంతుడి సెలెక్షన్ తప్పుబట్టడం సరికాదంటూ ఇంకొకరు మాటలు దూశారు.
"ప్రస్తుతం దేశంలో అత్యంత ప్రతిభావంతుల్లో ఒకడైన సూర్యకుమార్ను ఎంపిక చేయకపోవడం ఆశ్చర్యం కలిగించింది. బ్యాటింగ్‌ నైపుణ్యం పరంగా చూస్తే టీమ్ఇండియా అత్యుత్తమ ఆటగాడితో సూర్యకుమార్ను పోల్చగలను. నిలకడగా పరుగులు సాధిస్తున్నాడు. భారత జట్టులో స్థానం కోసం ఇంతకంటే ఏం చేయాలో నాకు తెలియట్లేదు. తన కెరీర్‌లో సూర్య అత్యుత్తమ దశలో ఉన్నాడు. ఎంపికకు ఫామ్, ఫిట్‌నెస్‌ ప్రమాణాలు కాకుండా ఇంకేముంటాయి? గాయం కారణంగా రోహిత్‌శర్మ జట్టు దూరమయ్యాడు. అతడి స్థానంలో సూర్యతో మిడిలార్డర్‌ను పటిష్టం చేయొచ్చు. సూర్యను ఎంపిక చేయకపోవడం వెనుక ఉద్దేశమేంటో బీసీసీఐ అధ్యక్షుడు సౌరభ్‌ గంగూలీ ప్రశ్నించాలి" - దిలీప్‌ వెంగ్‌సర్కార్‌
"ఐపీఎల్‌ ప్రదర్శన ఆధారంగా కేఎల్ రాహుల్‌ను టెస్టు జట్టులోకి ఎంపిక చేయడం చెడు సంప్రదాయం. మరీ ముఖ్యంగా గత కొన్ని టెస్టు మ్యాచ్‌ల్లో విఫలమైన ఆటగాడిని ఎంచుకున్నారు. అతడు విజయవంతమవుతాడా? విఫలమవుతాడా? అన్నది వేరే సంగతి. కాని ఇలాంటి ఎంపికలు రంజీ ఆటగాళ్లను తీవ్ర నిరుత్సాహానికి గురిచేస్తాయి" - సంజయ్‌ మంజ్రేకర్‌
"మంజ్రేకర్‌ టెస్టు జట్టులోకి రాహుల్ ఎంపికను ప్రశ్నించడాన్ని అస్సలు ఒప్పుకోను. మూడు ఫార్మాట్లలోనూ రాహుల్ అద్భుతమైన ఆటగాడు. ఆస్ట్రేలియాలో అరంగేట్రం చేసిన రాహుల్ అక్కడే తొలి సెంచరీ సాధించాడు. మంజ్రేకర్‌ ‘ముంబయి’ని దాటి ఆలోచించలేడు. అదే సమస్య. అతడి దృష్టిలో అంతా ముంబయే. హర్భ భోగ్లేకు కూడా ముంబయి తప్పితే ఇంకేం తెలియదు. వాళ్లు తటస్థులు కాకపోవడం అసలు సమస్య" - కృష్ణమాచారి శ్రీకాంత్‌
'ఒక కుర్రాడు మూడోస్థానంలో వచ్చి అలాంటి స్ట్రైక్‌రేట్‌తో ఆడడం ఎలా ఉంటుందో ఊహించుకోండి. ఒకవైపు వికెట్లు పడుతున్నా మరోవైపు ఒంటరిపోరాటం చేశాడు. అతడు నిలకడగా ఆడటమే మాకు చేసే అత్యంత మేలు. ఒక ఆటగాడిగా ఇలా నిలకడగా ఆడుతుంటే రివార్డులు వాటంతట అవే వస్తాయి. నేనేం చేయాలని జట్టు ఆశిస్తుందో అదే చేస్తాను. జట్టు బాగా ఆడితే సంతోషంగా ఉంటా. ఇక సూర్య గురించి మాట్లాడాలంటే టీమ్‌ఇండియాకు ఎంపిక చేయకపోవడం పట్ల ఎంతో నిరాశ చెంది ఉంటాడు' -కీరన్‌ పొలార్డ్‌
టీమ్‌ఇండియాకు ఎంపిక అవ్వాలంటే సూర్యకుమార్ ఇంకేం చేయాలో అర్థం కావడం లేదు. ప్రతీ సీజన్‌లోనూ రాణిస్తున్నాడు. రంజీల్లోనూ మంచి ప్రదర్శన చేస్తున్నాడు. బీసీసీఐ సెలెక్టర్లు ఒకసారి అతడి రికార్డులను పరిశీలించండి. - హర్భజన్‌ సింగ్‌
సూర్యనమస్కార్‌.. ధైర్యంతో సహనంగా ఉండు. - రవిశాస్త్రి
ఇవీ చదవండి:
- కేఎల్ రాహుల్కు ప్రమోషన్.. ఆస్ట్రేలియాకు వెళ్లే జట్టిదే
- భారత్-ఆస్ట్రేలియా మధ్య డే/నైట్ టెస్టు అప్పుడే
- ఆస్ట్రేలియా పర్యటనకు భారత్.. కుటుంబాలకు నో ఎంట్రీ! ఆస్ట్రేలియా పర్యటనకు వెళ్లే టీమ్ఇండియా జట్టు
