టీమ్ఇండియాతో జరిగిన నాలుగో టెస్టుకు సంబంధించి పలు విషయాలు వెల్లడించాడు ఇంగ్లాండ్ ఆల్రౌండర్ బెన్ స్టోక్స్. ఈ మ్యాచ్ జరిగిన అహ్మదాబాద్లో వేడి వాతావరణం కారణంగా తీవ్ర ఇబ్బందులు ఎదుర్కొన్నట్లు తెలిపాడు. సిరీస్ నిర్ణయాత్మక టెస్టుకు ముందే తమ జట్టుకు చెందిన పలువురు ఆటగాళ్లు డయేరియా బారిన పడ్డట్లు పేర్కొన్నాడు. 41 డిగ్రీల ఎండలో ఆడడం సవాలుతో కూడుకున్నదని అభిప్రాయపడ్డాడు.
వేడి వాతావరణం కారణంగా కేవలం వారంలోనే తాను 5 కేజీల బరువు తగ్గినట్లు స్టోక్స్ తెలిపాడు. డామ్ సిబ్లే 4 కేజీలు, జిమ్మీ అండర్సన్ 3 కేజీల బరువు కోల్పోయారని వెల్లడించాడు. జాక్ లీచ్ అయితే బౌలింగ్ స్పెల్స్ మధ్యలో పదే పదే మూత్రశాలకు వెళ్లాడని పేర్కొన్నాడు. అనారోగ్యానికి గురైనప్పటికీ బరిలోకి దిగామన్నాడు.
"ఇంగ్లాండ్ విజయానికి ఆటగాళ్లు పూర్తిగా శ్రమించారు. 41 డిగ్రీల ఎండలో ఆడటం అంటే సవాలే. ఇవి ఓటమి గురించి చెప్తున్న సాకులు కాదు. వాషింగ్టన్ సుందర్, రిషభ్ పంత్ అద్భుత ప్రదర్శన చేశారు. మా నుంచి విజయాన్ని దూరం చేశారు."
-బెన్ స్టోక్స్, ఇంగ్లాండ్ ఆల్రౌండర్.
మాజీల విమర్శలను పట్టించుకోవద్దు..
3-1తేడాతో టెస్టు సిరీస్ను కోల్పోయిన ఇంగ్లాండ్పై ఆ దేశ మాజీలు విమర్శలు చేసిన నేపథ్యంలో స్టోక్స్ స్పందించాడు. వాటిని పట్టించుకోవాల్సిన పని లేదని.. ఆటపై దృష్టి సారించాలని యువ ఆటగాళ్లకు సూచించాడు. "విమర్శలు చేయడమే వారి పని. ఆటలో పురోగతి సాధించడం మన పని" అని తెలిపాడు.
ఇదీ చదవండి: సచిన్, సెహ్వాగ్ల మధ్య సరదా సంభాషణ.. వీడియో వైరల్
