టీమిండియా మాజీ సారథి రాహుల్ ద్రవిడ్ జాతీయ క్రికెట్ అకాడమీ (ఎన్సీఏ)లో ప్రధాన కోచ్ బాధ్యతలు ఇంకా స్వీకరించలేదు. బీసీసీఐ విధించిన ఒక వ్యక్తికి ఒకే పదవి నిబంధన ఆ పదవిలో చేరనీయకుండా ద్రవిడ్కు అడ్డుతగులుతోంది. ప్రస్తుతం ఇండియా సిమెంట్స్‌లో ఉద్యోగిగా ఉన్న రాహుల్ ద్రవిడ్... జులై 1న జాతీయ క్రికెట్ అకాడమీ చీఫ్‌గా బాధ్యతలు స్వీకరించాల్సి ఉంది. కానీ.. బీసీసీఐ నూతన నిబంధనల ప్రకారం క్రికెట్‌కు సంబంధించిన ఏ వ్యక్తీ ఒకేసారి రెండు పదవుల్లో ఉండరాదు. అందుకే మిస్టర్ వాల్ ఏదో ఒక పదవికి రాజీనామా చేయాల్సి ఉంది.
" ద్రవిడ్ ఇంకా జాతీయ క్రికెట్ అకాడమీ చీఫ్‌గా బాధ్యతలు స్వీకరించలేదు. అతడు ఆ పదవిలో చేరాలంటే ఇండియా సిమెంట్స్‌కు రాజీనామా చేయాలి ".
- బీసీసీఐ ఉన్నతాధికారి
రెండు పదవుల్లో ఉన్నారని ఇటీవల మాజీ క్రికెటర్‌ వీవీఎస్‌ లక్ష్మణ్‌పై బీసీసీఐ అంబుడ్స్‌మన్‌లో ఫిర్యాదు చేశారు మధ్యప్రదేశ్ క్రికెట్ సంఘం సభ్యుడు సంజీవ్‌ గుప్తా. పిటిషన్ వేసిన వ్యక్తికి అనుకూలంగా తీర్పునూ వెల్లడించారు అంబుడ్స్‌మన్‌ జస్టిస్‌ డీకే జైన్‌.
ద్రవిడ్‌పైనా గుప్తా ఫిర్యాదు చేయడం వల్లే ఎన్సీఏ బాధ్యతల స్వీకరణ ఆలస్యం అవుతోంది. రెండేళ్లు ఎన్సీఏ బాధ్యతలు నిర్వహించనున్న ద్రవిడ్.... ఎన్సీఏ, జోనల్ క్రికెట్ అకాడమీలలో కోచ్‌ల నియామకంతో పాటు మహిళలు, తర్వాతి తరం క్రికెటర్లపై దృష్టి పెట్టాల్సి ఉంటుంది.
