బోర్డర్‌-గావస్కర్‌ టోర్నీలో మూడు టెస్టులకు సారథ్యం వహించనున్న అజింక్య రహానేకు వెటరన్ స్పిన్నర్ హర్భజన్సింగ్ పలు సూచనలు చేశాడు. కోహ్లీతో పోలిస్తే అతడి నాయకత్వ లక్షణాలు, వ్యక్తిత్వం భిన్నంగా ఉంటాయని తెలిపాడు. నాయకత్వం కోసం తన ఆటతీరు, వ్యక్తిత్వాన్ని మార్చుకోవద్దని సలహా ఇచ్చాడు.
"అజింక్య రహానేకు సారథ్యం కచ్చితంగా సవాలే. ఎందుకంటే అతడు గతంలో పూర్తిస్థాయి సిరీస్‌కు నాయకత్వం వహించలేదు. అయితే అతడు ప్రశాంతంగా, స్థిరంగా ఉంటాడు. ఎక్కువగా భావోద్వేగాలు పలికించడు. కోహ్లీతో పోలిస్తే ఎంతో భిన్నం. అందుకే అతడికిది కొత్త అనుభవం, కొత్త ఇన్నింగ్స్‌ అనే చెప్పాలి. అతడు ఎక్కువ పరుగులు చేసి జట్టుకు విజయాల్ని అందించాలని కోరుకుంటున్నా"
- హర్భజన్ సింగ్, టీమ్ఇండియా వెటరన్ స్పిన్నర్
"పరుగులు చేస్తూ విరాట్‌లాగే జట్టును రహానే ముందుకు తీసుకెళ్తాడని నమ్ముతున్నా. తను తనలాగే ఉండి అత్యుత్తమంగా ఆడాలి. నాయకుడు, బ్యాట్స్‌మన్‌గా కోహ్లీ లేని లోటు కచ్చితంగా కనిపిస్తుంది. ఎందుకంటే ఆసీస్‌లో అతడి బ్యాటింగ్‌ రికార్డు అద్భుతం. అతడి గణాంకాలు అక్కడెంతో బాగున్నాయి. ప్రతి ఆటగాడు అక్కడ అతడిలాగే ఆడాలని కోరుకుంటాడు. అందుకే టీమ్ఇండియా కచ్చితంగా అతడిని మిస్‌ అవుతుంది. నాయకుడిగా అతడి అనుభవం, దూకుడు, ముందుడి నడిపించే తత్వం ఎప్పటికీ అత్యుత్తమం. మైదానంలో అతడెంతో కసిగా ఉంటాడు" అని హర్భజన్ తెలిపాడు.
