కరోనా ఆంక్షల మధ్య ఐపీఎల్ నిరవధిక వాయిదా పడింది. టీ20 ప్రపంచకప్ నిర్వహణపైనా అనిశ్చితి నెలకొంది. ఈ విషయంపై ఐసీసీ స్పష్టతనిస్తేనే.. ఐపీఎల్ను జరిపే ప్రణాళికపై బీసీసీఐ దృష్టి సారించనుంది. అయితే, ఇప్పటివరకు బోర్డు నుంచి ఎటువంటి స్పష్టత రాలేదు. కానీ, ఐపీఎల్ ఫ్రాంచైజీలు మాత్రం యూఎఈలో లీగ్ నిర్వహణకు ప్రణాళికలు రచిస్తున్నాయి. తాజాగా, ఫ్రాంచైజీ అధికారి ఒకరు మీడియాతో మాట్లాడుతూ.. ఇప్పటికే ఆటగాళ్లకోసం ప్రత్యేక విమానాలు, హోటల్ గదుల బుకింగ్ తదితర విషయాలపై అన్ని సన్నాహాలు ప్రారంభించినట్లు స్పష్టం చేశారు.
"ఇటువంటి విషయాల్లో ముందుగానే ప్లాన్ చేసుకోవాలి. మాకు ఇచ్చిన కొన్ని ప్రణాళికలను అనుసరించి.. తదనుగుణంగా ముందుకు వెళ్తున్నాం. అంతేకాకుండా అబుదాబిలో ఉండాలనుకుంటున్న హోటళ్లనూ నిర్ణయించాం. యూఏఈకి విమానంలో వెళ్లే సదుపాయం గురించి.. అక్కడ క్వారంటైన్ సమయాన్ని కూడా అంచనా వేస్తున్నాం. కచ్చితంగా అన్ని భద్రతా ప్రమాణాలు పాటిస్తాం."
-ఫ్రాంచైజీ అధికారి
మొదట స్వదేశంలో ఐసోలేషన్...
యూఏఈకి వెళ్లే ముందు భారత్లో ఆటగాళ్లు ఐసోలేషన్లో ఉండే విధంగా ఆలోచనలు చేస్తున్నట్లు మాజీ ఛాంపియన్ ఫ్రాంచైజీకి చెందిన అధికారి ఒకరు తెలిపారు. "ప్రస్తుతం అందరూ ఇళ్లలోనే ఉన్నారు. కాబట్టి మనలో ఒకరు లక్షణాలతో ఉన్నవారైతే.. ఇతరులకూ మహమ్మారి సోకే ప్రమాదం ఉంది. అందుకే కొన్ని వారాల పాటు ఐసోలేషన్లో ఉండి పరీక్షలు చేయించుకోవడం మంచిది." అని వివరించారు.
చార్టర్డ్ విమానాల వైపు చూపులు
ప్రయాణ ప్రణాళికల గురించి మాట్లాడుతూ.. వీలైనంత వరకు చాలా జట్లు ప్రత్యేక విమానాల్లో ప్రయాణించే అవకాశం ఉందని తెలిపారు. "ఆగస్టు చివరి నాటికి రెగ్యులర్ విమానాలు నడుస్తాయో లేదో తెలియదు. అదే నెల చివరి నాటికి జట్లు యూఏఈలో ఉండాలని అనుకుంటున్నాయి. కాబట్టి ఇటువంటి పరిస్థితుల్లో అద్దె విమానాలను తీసుకోవడమే ఉత్తమ మార్గం. ఒక్కో విమానంలో 35-40 మంది దాకా యూఏఈకి వెళ్తారు." అని ఆ అధికారి పేర్కొన్నారు
ఇక విదేశీ ఆటగాళ్లు భారత్తో పాటు యూఏఈలోనూ క్వారంటైన్లో ఉండాల్సి వస్తుందని.. అందుకే నేరుగా వారి దేశాల నుంచే యూఏఈకి వచ్చే అవకాశం ఉందని పేర్కొన్నారు.
