కరోనా ప్రభావంతో అంతర్జాతీయ క్రికెట్ మండలి(ఐసీసీ) జారీచేసిన కొత్త మార్గదర్శకాలపై టీమ్ఇండియా పేసర్ జస్ప్రీత్ బుమ్రా మాట్లాడాడు. బంతిపై లాలాజలం పూయడం నిషేధించిన క్రమంలో ప్రత్యామ్నాయం అవసరమని అభిప్రాయపడ్డాడు. ఐసీసీ నిర్వహించిన వీడియో సిరీస్ 'ఇన్సైడ్ అవుట్'లో ఇయాన్ బిషప్, షాన్ పొలాక్లతో జరిగిన చర్చలో ఈ విషయాన్ని వెల్లడించాడు.
"మైదానంలో కరచాలనం చేసుకోవడం, కలిసి అభినందనలు తెలపడం వంటివి తొలగిస్తే పెద్దగా ఇబ్బంది ఉండదు. బంతిపై లాలాజలాన్ని వాడకూడదనేది మాత్రం నన్ను బాధించింది. ఇందుకు ప్రత్యమ్నాయం ఉంటే బాగుంటుంది. బంతికి మెరుపు తెప్పించకపోతే అది బ్యాట్స్మెన్కు అనుకూలంగా మారుతుంది. దీని కోసం ఏదైనా వేరే సదుపాయం చేస్తే బాగుంటుంది" అని బుమ్రా చెప్పాడు.
అలా అయితే బ్యాట్స్మెన్కు లాభం
రెండేళ్లుగా ఫాస్ట్ బౌలర్లకు పరిస్థితులు అనుకూలంగా మారాయని వెస్టిండీస్ మాజీ పేసర్ బిషప్ చెప్పగా.. దానితో ఏకీభవించాడు బుమ్రా. అయితే టెస్టు క్రికెట్లో బంతి మనకు అనుకూలంగా ఉంటుందని.. వన్డేల్లో రెండు బంతులను ఉపయోగించడం వల్ల కొత్త బంతికి మెరుపు ఇవ్వకపోతే స్పిన్ తిరగదని బుమ్రా అభిప్రాయపడ్డాడు. లాక్డౌన్ కారణంగా ఇంటికే పరిమితమైన ఇతడు.. మూడు నెలల తర్వాత బౌలింగ్ చేయడానికి ఇంట్లోనే కసరత్తులు చేస్తున్నట్లు తెలిపాడు.
ఇదీ చూడండి... ధోనీ భార్యను తెగ ఇబ్బంది పెట్టిన చాహల్!
