ప్రపంచంలోనే అతిపెద్ద క్రికెట్ బోర్డు ఏదైనా ఉందంటే అది బీసీసీఐ. ఇంతటి సంపన్న బోర్డు.. క్రికెటర్లకు బకాయిలు చెల్లించడంలో ఆలస్యం వహిస్తోంది. గతేడాది అక్టోబరు నుంచి 27 మంది కాంట్రాక్టు ఆటగాళ్లకు త్రైమాసిక చెల్లింపులు లభించలేదని నివేదికలు వెల్లడించాయి. అంతే కాకుండా 2019 నుంచి రెండు టెస్టులు, తొమ్మిది వన్డేలు, ఎనిమిది టీ20లు ఆడిన ఆటగాళ్లకు ఇంకా మ్యాచ్ బకాయిలు అందలేదని తెలుస్తోంది.
వీరిలో ఏ ప్లస్ కేటగిరీలో విరాట్ కోహ్లీ, రోహిత్ శర్మ, జస్ప్రీత్ బూమ్రా ఉన్నారు. బీసీసీఐ చివరి బ్యాలెన్స్ షీట్ ప్రకారం.. 2018 మార్చి నాటికి రూ.5,526 కోట్ల బ్యాంక్ బ్యాలెన్స్ ఉంది. స్థిర డిపాజిట్లలో రూ.2,992 కోట్లు ఉన్నాయి. వీటితో పాటు స్టార్ టీవీతో రూ.6,138.1 కోట్లతో ఐదేళ్ల వరకు ప్రసార ఒప్పందం కుదుర్చుకుంది.
డిసెంబరు నుంచి బీసీసీఐకి ఫైనాన్షియల్ అధికారి లేరు. ఈ క్రమంలోనే ఆటగాళ్లకు చెల్లింపులు ఆలస్యం అయ్యుండొచ్చని నివేదికలు పేర్కొన్నాయి. అయితే కాంట్రాక్టు ఆటగాళ్లు మాత్రం తమకు రావాల్సిన మొత్తాన్ని చెల్లించాలని డిమాండ్ చేస్తున్నారు. మరోవైపు దేశీయ ఆటగాళ్లకూ ఈ కష్టాలు తప్పట్లేదు.
