ఆస్ట్రేలియా - ఇంగ్లాండ్ మధ్య జరుగుతున్న యాషెస్ సిరీస్ రసవత్తరంగా సాగుతోంది. తొలి టెస్టు గెలిచి జోరు మీదున్న ఆసీస్ను రెండు, మూడు టెస్టుల్లో కట్టడి చేసింది ఇంగ్లీష్ జట్టు. 1-1తో సమం చేసి సిరీస్ ఆశలు సజీవం చేసుకుంది. నేడు నాలుగో టెస్టు జరగనుంది. మాంచెస్టర్ వేదికగా మధ్యాహ్నం 3గంటలకు మ్యాచ్ ప్రారంభం కానుంది.
ఇంగ్లాండ్ నిలిచేనా...
ప్రపంచ విజేతగా నిలిచిన ఇంగ్లాండ్ మెగాటోర్నీ తర్వాత ఆడుతున్న ప్రతిష్ఠాత్మక సిరీస్ యాషెస్. మధ్యలో ఐర్లాండ్తో ఏకైక టెస్టు ఆడినప్పుటికీ అసలు సిసలు సమరం యాషెస్ సిరీసే. స్వదేశంలో జరుగుతున్న ఈ టోర్నీలో నెగ్గి ప్రపంచ ఛాంపియన్షిప్ను ఘనంగా ఆరంభించాలనుకుంటుంది. అయితే ఆసీస్ ఆటగాడు స్మిత్ దెబ్బకు తొలి టెస్టులో పరాజయం చెందిన ఇంగ్లీష్ జట్టు తర్వాత జోరు పెంచింది. రెండో టెస్టును డ్రా చేసుకుని.. మూడో టెస్టులో విజయం సాధించి సిరీస్ను సమం చేసింది.
ఇంగ్లాండ్ బ్యాటింగ్ లైనప్లో టాపార్డర్ విఫలమవుతోంది. ప్రపంచకప్లో రాణించిన జేసన్ రాయ్ యాషెస్ సిరీస్లో పెద్దగా ఆకట్టుకోలేకపోయాడు. మూడు మ్యాచ్ల్లో జేసన్ చేసింది 67 పరుగులే. నెంబర్ 4లో ఆడుతున్న జోయ్ డిన్లైను జేసన్ స్థానంలో బ్యాటింగ్కు పంపితే ఇంగ్లాండ్ పరిస్థితి మెరుగయ్యే అవకాశం ఉంది. బౌలింగ్లో స్టువర్ట్ బ్రాడ్, జోఫ్రా ఆర్చర్, క్రిస్ వోక్స్ లాంటి మేటి బౌలర్లు ఇంగ్లాండ్ సొంతం. బ్రాడ్ 25.35 సగటుతో 14 వికెట్లతో లీడింగ్ వికెట్ టేకర్గా కొనసాగుతున్నాడు.
స్టోక్స్ మాస్టర్ స్ట్రోక్..
మూడో టెస్టులో దాదాపు ఓటమి అంచులవరకు వెళ్లిన ఇంగ్లాండ్ను తన వీరోచిత పోరాటంతో ఆదుకున్నాడు బెన్ స్టోక్స్. 135 పరుగులతో అజేయంగా నిలిచి జట్టును విజయ తీరాలకు చేర్చాడు. ప్రపంచకప్ మాదిరిగానే యాషెస్లోనూ అసాధారణ పోరాట పటిమను చూపిస్తున్నాడు.
స్మిత్ వస్తున్నాడు..
ఏడాది నిషేధం అనంతరం టెస్టు మ్యాచ్ ఆడిన స్టీవ్ స్మిత్ ఎడ్జబాస్టన్ వేదికగా జరిగిన తొలి మ్యాచ్లోనే అదరగొట్టాడు. రెండు ఇన్నింగ్స్ల్లో రెండు శతకాలు చేసి ఆసీస్కు అద్భుత విజయాన్ని అందించాడు. రెండో టెస్టులోనూ 92 పరుగులు చేసి కాంకషన్గా వెనుదిరిగాడు. ఆర్చర్ వేసిన బౌన్సర్ స్మిత్ మెడను బలంగా తాకింది. తీవ్ర నొప్పితో మైదానాన్ని వీడిన స్మిత్ మూడో టెస్టుకు దూరంగా ఉన్నాడు. గాయం నుంచి కొలుకున్న స్మిత్ నాలుగో టెస్టుకు రానుండడం కంగారూ జట్టుకు కలిసొచ్చే అంశం.
నాలుగులో మరో అద్భుతం..
అప్పటివరకు నాలుగో స్థానంలో ఆడిన స్మిత్ గాయం కారణంగా మూడో టెస్టుకు దూరమయ్యాడు. అతడి స్థానంలో కాంకషన్ సబ్స్టిట్యూట్గా బరిలో దిగాడు మార్నస్ లబుషేన్. వరుసగా మూడు అర్ధశతకాలతో ఆకట్టుకున్నాడు. అయితే స్మిత్ రాకతో ఫామ్లో ఉన్న లబుషేన్ను పక్కన పెట్టకుండా.. విఫలమవుతున్న ఉస్మాన్ ఖవాజాను దూరం పెట్టే అవకాశముంది.
ఇంగ్లాండ్ మాదిరిగానే ఆసీస్ టాపార్డర్ కూడా అంతగా ప్రభావం చూపలేకపోతుంది. ఈ సిరీస్లో వార్నర్ (61) ఒక్క అర్ధశతకం మినహా పెద్దగా రాణించలేదు. మరో ఓపెనర్ బాన్క్రాఫ్ట్ చెప్పుకోదగ్గ ప్రదర్శన చేయలేదు. వీరు సత్తాచాటాల్సి ఉంది. మిడిల్ ఆర్డర్ విభాగంలో ట్రావిస్ హెడ్, మ్యాథ్యూ వేడ్ నిలకడగా ఆడుతున్నారు.
బౌలింగ్ విభాగంలో ప్యాట్ కమిన్స్, నాథన్ లయన్, హాజిల్వుడ్ రాణిస్తున్నారు. అయితే కీలక సమయాల్లో చేతులెత్తేస్తోంది ఆసీస్ పేస్ దళం. మూడో టెస్టులో ఇంగ్లీష్ జట్టు తోక తెంచలేక నానా అవస్థలు పడింది. బెన్ స్టోక్స్ను రెండు సార్లు ఔట్ చేసే అవకాశమొచ్చినా సద్వినియోగ పరచుకోలేకపోయారు.
ఇది చదవండి: టెస్ట్ ర్యాంకింగ్స్: అగ్రస్థానం కోల్పోయిన కోహ్లీ
