టీమ్ఇండియా మాజీ క్రికెటర్ రాహుల్ ద్రవిడ్ అడుగుజాడల్లో నడవాలని పాక్ మాజీ ఆటగాళ్లకు సూచించాడు ఆ దేశ మాజీ సారథి షాహిద్ అఫ్రిది. నైపుణ్యం ఉన్న యువ ఆటగాళ్లను గుర్తించి.. వారిని మెరికల్లా తీర్చదిద్దడం కోసం ద్రవిడ్ తీవ్రంగా శ్రమించాడని కొనియాడాడు. భారత జట్టుకు ఎందరో ప్రతిభావంతమైన ఆటగాళ్లను అందించాడని.. ఇదే రీతిలో తమ దేశ మాజీ దిగ్గజ ఆటగాళ్లు కూడా యువ క్రికెటర్లలో ప్రతిభను గుర్తించి వారిని సరైన రీతిలో శిక్షణ ఇవ్వాలని అభిప్రాయపడ్డాడు.
"పాక్.. ప్రతిభ, సామర్థ్యం ఉన్న ఆటగాళ్ల కొరతను ఎదుర్కొంటుందని నా అభిప్రాయం. కాబట్టి మా మాజీలు భవిష్యతులో రాబోయే యువ క్రికెటర్లకు సరైన రీతిలో మార్గనిర్దేశం చేసి ఎదిగేలా చూడాలి. అప్పుడే ఈ సమస్యను అధిగమించగలం. నేను ఆడేటప్పుడు కూడా కోచ్ల వల్ల బౌలర్లు సమస్యలను ఎదుర్కొనేవాళ్లు. కాబట్టి పీసీబీ నా వ్యాఖ్యలను పరిగణనలోకి తీసుకొని ఈ సమస్యను పరిష్కరించాలని సూచన."
- షాహిద్ అఫ్రిది, పాక్ మాజీ సారథి.
భారత మాజీ క్రికెటర్ ద్రవిడ్.. భారత్-ఏ, అండర్-19 జట్ల కోచ్‌గా ఎంతో సమర్థవంతంగా బాధ్యతలు నిర్వహించాడు. ఈ నేపథ్యంలోనే యువ ఆటగాళ్లలో ప్రతిభను గుర్తించి మెరుగ్గా తీర్చిదిద్దటంలో పాక్ మాజీలు ఇంజమామ్ ఉల్ హక్, యూనిస్ ఖాన్, మహ్మద్ యూసుఫ్ సరైనోళ్లని అభిప్రాయపడ్డాడు అఫ్రిది.
ఇదీ చూడండి : 14 ఏళ్ల తర్వాత.. పాక్ పర్యటనకు దక్షిణాఫ్రికా
