క్రికెట్ అంటేనే ఫుల్ ఆఫ్ సర్ప్రైజెస్. మైదానంలో ఎప్పుడు ఏం జరుగుతుందో? ఏ జట్టు గెలుస్తుందో చెప్పడం చాలా కష్టం. ఒకానొక సమయంలో ప్రపంచ ఉత్తమ జట్లు కూడా అనూహ్య రీతిలో ఓడిన సందర్భాలున్నాయి. అలా క్రికెట్కు పుట్టినిల్లైన ఇంగ్లాండ్ టీమ్.. ఐర్లాండ్ (2011లో), బంగ్లాదేశ్ (2015లో) వంటి చిన్న జట్ల చేతిలో పరాభవాన్ని ఎదుర్కొంది. అది కూడా ప్రపంచకప్ లీగు దశలోనే పరాజయం పొందడం గమనార్హం.
అలా మ్యాచ్ గమనాన్నే మలుపుతిప్పే శక్తి యువ క్రికెటర్లకు మాత్రమే ఉంది. జట్టులో సీనియర్ క్రికెటర్లు ఉన్నా.. కొత్త ఆటగాళ్లు చేరితే, అనుభవానికి అదనపు బలాన్నిచ్చినట్లవుతుంది. ఈ విధంగా యువ క్రికెటర్లను ఉపయోగించుకోవడంలో భారత క్రికెట్ నియంత్రణ మండలి (బీసీసీఐ) ముందుందనే చెప్పాలి. క్రికెట్కు ఎక్కువ ప్రాధాన్యమిచ్చే మనదేశంలో అండర్-16, 18 నుంచే క్రికెటర్లపై బీసీసీఐ ప్రత్యేక శ్రద్ధ చూపిస్తూ ఎప్పటికప్పుడు జాతీయ జట్టులో యువతరానికి అవకాశాలు ఇస్తూనే ఉంది. వచ్చిన ఛాన్సును అందిపుచ్చుకునే విధంగా యువ ఆటగాళ్లు అద్భుతమైన ప్రదర్శనతో తొలి మ్యాచ్లోనే ఆకట్టుకునే ప్రదర్శన చేస్తున్నారు. ఆ విధంగా అరంగేట్ర మ్యాచ్లతోనే క్రికెట్ అభిమానుల్లో లక్ష్యాన్ని తమ భుజాలపై వేసుకుని జట్టును విజయతీరాలకు చేర్చిన టీమ్ఇండియా యువ క్రికెటర్ల గురించి తెలుసుకుందాం.
1) ఇషాంత్ శర్మ
2008లో నాలుగు టెస్టుల సిరీస్ ఆడేందుకు ఆస్ట్రేలియా జట్టు భారత్కు చేరుకుంది. అంతకుముందు ఇరుజట్ల మధ్య జరిగిన సిరీస్లో భారత్ ఓడిపోగా.. దానికి ప్రతీకారం తీర్చుకోవాలని సన్నద్ధమైంది. అదే సిరీస్తో పేసర్ ఇషాంత్ శర్మ అరంగేట్రం చేశాడు. బెంగుళూరు వేదికగా తొలిటెస్టు జరిగింది. ఈ మ్యాచ్ తొలిఇన్నింగ్స్లో నాలుగు వికెట్లు పడగొట్టాడు ఇషాంత్. ఆ మ్యాచ్ మొత్తంగా 6 వికెట్లు సాధించాడు. సైమన్ కటిచ్, షేన్ వాట్సన్, బ్రాడ్ హాడిన్, కెెమెరూన్ వైట్ వంటి స్టార్ బ్యాట్స్మెన్ను పెవిలియన్ బాట పట్టించాడు.
ఈ సిరీస్ను టీమ్ఇండియా 2-0 తేడాతో గెలుపొందింది. అప్పుడే అరంగేట్రం చేసిన ఇషాంత్ శర్మ బౌలింగ్ ఈ ఘనవిజయానికి సహకరించింది. తన తొలి ప్రదర్శనతో మ్యాచ్ గమనాన్నే మార్చేశాడు ఇషాంత్.
2) రోహిత్ శర్మ
ఐసీసీ టీ20 ప్రపంచకప్-2007.. భారత క్రికెట్ అభిమానులకు ఎప్పటికీ గుర్తుండిపోయే టోర్నీ. ఆ టోర్నీతోనే మహేంద్రసింగ్ ధోనీ టీమ్ఇండియా కెప్టెన్గా ఎంపికయ్యాడు. అంతేకాకుండా టీ20 ప్రపంచకప్ ఆరంభ టోర్నీలోనే టీమ్ ఇండియా ఛాంపియన్గా నిలిచింది. అందుకే ఈ ఏడాది అంత స్పెషల్. విశేషమేమిటంటే ఆ టీమ్లో ఉన్నవాళ్లంతా యువక్రికెటర్లే.
టోర్నీ ఆరంభంలో టీమ్ఇండియా ఆచితూచి ఆడుతూ వచ్చింది. స్కాట్లాండ్తో భారత జట్టు ఆడాల్సిన తొలి మ్యాచ్ రద్దైంది. ఆ తర్వాత న్యూజిలాండ్తో జరిగిన మ్యాచ్లో ఓటమి పాలైంది. చివరికి ఎలాగోలా సూపర్ 8కి ధోనీసేన చేరింది. నాకౌట్ స్టేజ్లో దక్షిణాఫ్రికాతో ఆడిన మ్యాచ్లో ఓపెనర్లు పేలవంగా ఆడి వెనుదిరిగారు. ఆ తర్వాత బ్యాటింగ్కు దిగిన రోహిత్ శర్మ, ధోనీ జట్టుకు చెప్పుకోదగ్గ స్కోరు అందించారు. హిట్మ్యాన్ అర్థశతకంతో అలరించగా.. 45 పరుగుల చేసిన తర్వాత మహీ రనౌట్ అయ్యాడు. ఫలితంగా 5 వికెట్లు కోల్పోయిన టీమ్ఇండియా 153 పరుగులు చేసింది.
ఆ తర్వాత బరిలోకి దిగిన సఫారీలు నిర్ణీత 20 ఓవర్లలో 9 వికెట్లు కోల్పోయి 116 పరుగులకే పరిమితమయ్యారు. భారత బౌలర్ ఆర్పీ సింగ్ (4 వికెట్లు) ప్రత్యర్థిని దెబ్బతీశాడు. అయితే ఈ మ్యాచ్లో రోహిత్ శర్మ చేసిన అర్ధశతకం మ్యాచ్ గమనాన్ని మార్చేసింది.
3) మహేంద్రసింగ్ ధోనీ
2005లో జరిగిన పెప్సీ వన్డే సిరీస్కు భారత్ ఆతిథ్యం ఇచ్చింది. సిరీస్లోని మ్యాచ్లో ధోనీ పేలవ ప్రదర్శనతో 7 బంతుల్లో 3 పరుగులు చేసి వెనుదిరిగాడు. దీంతో ధోనీ ప్రదర్శనపై అందరూ అసంతృప్తికి గురయ్యారు.
అదే సిరీస్లో వైజాగ్ వేదికగా పాకిస్థాన్తో జరిగిన వన్డేలో సెహ్వాగ్తో కలిసి ధోనీ విజయవంతమైన భాగస్వామ్యాన్ని నెలకొల్పాడు. 148 పరుగులు చేసి భారత జట్టు విజయానికి బాటలు వేశాడు.
4) వాషింగ్టన్ సుందర్
ఆస్ట్రేలియాతో ఇటీవల జరిగిన బోర్డర్-గావస్కర్ ట్రోఫీ 2020-21 క్రికెట్ చరిత్రలో చిరస్థాయిగా నిలిచిపోతుంది. ఈ సిరీస్ ప్రారంభానికి ముందు స్టార్ ఆటగాళ్లందరూ గాయాలపాలైనా.. రెండో టెస్టు నుంచి కెప్టెన్ విరాట్ కోహ్లీ అందుబాటులో లేకపోయినా, రహానె సారథ్యంలోని యువ క్రికెటర్లు చారిత్రక విజయాన్ని నమోదు చేశారు.
నాలుగు మ్యాచ్ల టెస్టు సిరీస్లో మూడు మ్యాచ్ల తర్వాత 1-1తో ఇరుజట్లు సమంగా నిలిచాయి. నాలుగో టెస్టు(గబ్బా వేదికగా)కు సిద్ధమయ్యాయి. సిరీస్ నిర్ణయాత్మక మ్యాచ్ కావడం వల్ల ఇరుజట్లు తమతమ వ్యూహాలను సిద్ధం చేసుకున్నాయి. గబ్బా స్టేడియంలో 32 ఏళ్లుగా ఆసీస్ జట్టుకు ఓటమే లేదు. అయితే ఈ రికార్డును భారత యువ ఆటగాళ్లు చెరిపేశారు.
అదే మ్యాచ్లో టెస్టుల్లో అరంగేట్రం చేసిన వాషింగ్టన్ సుందర్పై ఎవ్వరికీ ఎలాంటి అంచనాలు లేవు. కానీ, బ్యాటింగ్తో పాటు బౌలింగ్లోనూ ప్రత్యర్థిపై అనూహ్యంగా విరుచుకుపడ్డాడు. తొలి ఇన్నింగ్స్లో సుందర్, శార్దూల్ భాగస్వామ్యం తర్వాత మ్యాచ్ గమనమే పూర్తిగా మారిపోయింది. ఈ మ్యాచ్లో యువ ఆటగాళ్లైన మహ్మద్ సిరాజ్ (6 వికెట్లు), శార్దూల్ ఠాకూర్, నటరాజన్, రిషబ్ పంత్ ఆసీస్పై చారిత్రక విజయానికి కారణమయ్యారు.
వాషింగ్టన్ సుందర్.. అరంగేట్ర టెస్టు తొలి ఇన్నింగ్స్లో 62 పరుగులతో పాటు 3 వికెట్లు పడగొట్టి.. రెండో ఇన్నింగ్స్లో ఒక్క వికెట్తో పాటు 22 పరుగులు నమోదు చేశాడు.
5) మహ్మద్ కైఫ్
లార్డ్స్ వేదికగా 2002లో జరిగిన నాట్వెస్ట్ సిరీస్ అంటే భారత క్రికెట్ అభిమాని ఇప్పటికీ జ్ఞాపకమే. ఈ సిరీస్లో భారత్తో పాటు ఇంగ్లాండ్, శ్రీలంక జట్లు కూడా ట్రోఫీ కోసం పోరాడాయి. బలమైన ప్రత్యర్థులతో ఆడుతూ ఫైనల్కు చేరుకుంది టీమ్ఇండియా. అయితే ఫైనల్కు చేరిన ప్రతి సిరీస్లోనూ భారత్ జట్టు ఓడిపోతుందనే అపవాదు అప్పట్లే ఉండేది. అయితే ఆ అంచనాలను తలకిందులు చేస్తూ గంగూలీసేస ఘనవిజయాన్ని నమోదు చేసింది.
ఇంగ్లాండ్తో జరిగిన తుదిపోరులో తొలుత బ్యాటింగ్ చేసిన ఆతిథ్య జట్టు నిర్ణీత 50 ఓవర్లలో 5 వికెట్లు కోల్పోయి 325 పరుగులు చేసింది. ఛేదనకు దిగిన భారత జట్టు ఓపెనర్, కెప్టెన్ సౌరవ్ గంగూలీ(60) అర్ధ శతకంతో స్కోరుబోర్డును పరుగులు పెట్టించినా.. ఆ తర్వాత వచ్చిన బ్యాట్స్మెన్ చెప్పుకోదగ్గ ప్రదర్శన చేయలేదు.
146 పరుగులకే 5 వికెట్లు కోల్పోయిన భారత జట్టు కష్టాల్లో పడింది. అప్పుడు 6వ స్థానంలో బ్యాటింగ్కు దిగిన యువరాజ్ సింగ్ (69) ఆకట్టుకున్నాడు. ఎలాంటి అంచనాలు లేని మహ్మద్ కైఫ్ ఏకంగా 87 పరుగులు చేసి జట్టును విజయతీరాలకు చేర్చాడు. ఈ మ్యాచ్ గెలిచిన అనంతరం కెప్టెన్ సౌరవ్ గంగూలీ తన షర్ట్ విప్పి గాల్లో తిప్పుతూ ఆనందాన్ని వ్యక్తం చేశాడు.
ఇదీ చూడండి: కుల్దీప్కు మరోసారి అన్యాయం.. అభిమానుల ఆగ్రహం!
